महावितरणकडून ५ हजार ३८१ जणांची विद्युत सहायक पदासाठी निवड

महावितरणकडून ५ हजार ३८१ जणांची विद्युत सहायक पदासाठी निवड

सकाळ वृत्तसेवा
मुंबई, ता. १६ : महावितरणने तब्बल ५ हजार ३८१ जणांची विद्युत सहायक पदासाठी निवड केली आहे. त्याबाबतची परिमंडलनिहाय निवड यादी कंपनीच्या संकेतस्थळावर जाहीर करण्यात आली आहे. संबंधित सर्व उमेदवारांच्या मूळ कागदपत्रांची व प्रमाणपत्रांची पडताळणी परिमंडल कार्यालयांमध्ये २० ते २२ ऑगस्टदरम्यान तीन दिवस चालणार आहे. त्यामुळे या उमेदवारांनी त्यांच्या नावासमोर नमूद परिमंडल कार्यालयांमध्ये मूळ कागदपत्रांसह स्वतः उपस्थित रहाणे बंधनकारक असल्याचे महावितरणने स्पष्ट केले आहे.

महावितरणने विद्युत सहायक या पदासाठी मे मध्ये उमेदवारांची ऑनलाइन क्षमता चाचणी घेतली होती. यात निवड झालेल्या उमेदवारांची यादी ३० जुलैला सविस्तर माहिती व सूचनेसह कंपनीच्या संकेतस्थळावर प्रसिद्ध करण्यात आली आहे. तर १४ ऑगस्टला निवड यादीतील उमेदवार व त्यांना वर्ग केलेल्या परिमंडलांची यादी जाहीर करण्यात आली आहे. त्यानंतर आता २० ते २२ ऑगस्टदरम्यान विद्युत सहायक पदासाठी निवड झालेल्या उमेदवारांच्या ऑनलाइन अर्जामधील नोंदी, अर्हता, कागदपत्रे व प्रमाणपत्रांची छाननी व पडताळणी त्यांना वर्ग केलेल्या संबंधित परिमंडल कार्यालयांमध्ये होणार आहे. या तीनही दिवशी संबंधित परिमंडलांमध्ये सकाळी १० वाजता मूळ कागदपत्रांची पडताळणी सुरू होईल. नमूद दिवशी काही कारणास्तव पडताळणी पूर्ण झाली नाहीतर दुसऱ्या दिवशी करण्यात येईल. तथापि, सर्व मूळ कागदपत्रे व प्रमाणपत्रांसह संबंधित उमेदवारांनी स्वतः हजर राहणे आवश्यक आहे.