विश्वविक्रम करणाऱ्या कोकणनगर गोविंदा पथकाची विजयी रॅली

विश्वविक्रम करणाऱ्या कोकणनगर
गोविंदा पथकाची विजयी रॅली
जोगेश्‍वरी, ता. १८ (बातमीदार) ः दहीहंडी महोत्सवात ठाण्याच्या मैदानाने इतिहास घडवला. जोगेश्वरीतील कोकणनगर गोविंदा पथकाने तब्बल १० थरांचा मानवी मनोरा रचत विश्वविक्रम प्रस्थापित केला. याआधीचा ‘जय जवान’ पथकाचा विक्रम मोडून कोकणनगरने आपले वर्चस्व ठसवलं. या थरारक पराक्रमानंतर रविवारी (ता. १७) ९ वाजता भव्य विजय मिरवणूक काढण्यात आली.
कोकणनगर, सर्वोदयनगर, मेघवाडी मार्गे पुन्हा कोकणनगर येथे मिरवणुकीची सांगता झाली. ढोल-ताशांचा गजर, फटाक्यांची आतषबाजी आणि जल्लोषात पथकाचे भव्य स्वागत करण्यात आले. पूर्वेश सरनाईक यांनी पथकाचे अभिनंदन केले. पथकाचे प्रशिक्षक विवेक कोचरेकर म्हणाले, हा विक्रम म्हणजे आमच्या १२ वर्षांच्या अथक परिश्रमाचे फलित आहे. आमचे ध्येय फक्त हंडी फोडणं नव्हते, तर जागतिक पातळीवर ठसा उमटवणे हे होते. या पराक्रमानंतर कोकणनगर पथकाचे नाव सामाजिक माध्यमांवर गाजत आहे. २५ लाखांचे बक्षीस आणि जनसमर्थन मिळाल्यानंतर या विक्रमाची चर्चा राज्यभर रंगली आहे. दरम्यान, कोकणनगरच्या या विश्वविक्रमामुळे ‘जय जवान’ आणि कोकणनगर यांच्यातील स्पर्धा आता आणखी चुरशीची होणार असल्याची चर्चाही सुरू आहे.