ऑस्टोमी रुग्णाला दिव्यांग दर्जा द्या

ऑस्टोमी रुग्णाला दिव्यांग दर्जा द्या
गजानन कीर्तिकर यांची मागणी
मुंबई, ता. १८ : ऑस्टोमी रुग्णांना केंद्र सरकारने दिव्यांग श्रेणीत आणि जीवनाशक औषधांसाठीच्या यादीत समाविष्ट करावे अन्यथा दिल्ली येथे व मुंबई येथे धरणे धरण्यात येईल, असा इशारा शिवसेना नेते माजी खासदार गजानन कीर्तिकर यांनी येथे दिला आहे.
ऑस्टोमी रुग्णांसाठी काम करणाऱ्या ग्लोबल कॅन्सर कार्डियाक अँड ऑस्टोमी केअर फाउंडेशन या संस्थेच्या वार्षिक सर्वसाधारण सभेत ते प्रमुख अतिथी म्हणून बोलत होते. या वेळी संस्थेचे विश्वस्त सुरेश राठोड, राजेंद्र प्रसाद गुप्ता, सुभाष लोखंडे, मारिया कारवालो आदी उपस्थित होते.
हा आजार मोठ्या आतड्याचा कर्करोग किंवा मूत्राशयाच्या कर्करोगामुळे होतो. आज देशात पाच लाखांपेक्षा जास्त ऑस्टोमी रुग्ण आहेत. हे रुग्ण नैसर्गिकरित्या मलमूत्र विसर्जित करू शकत नाहीत. त्यामुळे त्यांना पोटावर शस्त्रक्रिया करून नळीद्वारे प्लॅस्टिक पिशवीमध्ये मलमूत्र जमा करावे लागते. ती पिशवी २४ तास लावावी लागते व चार ते पाच दिवसांनी बदलावी लागते. एका पिशवीची किंमत सहाशे रुपये असल्याने रुग्णाला तिचा वार्षिक खर्च अंदाजे ४५ हजार रुपये येतो. तसेच रुग्णांना समाजात वावरताना, प्रवास करताना या पिशवीला धक्का न लागता प्रवास करण्याची जिकिरीचे होते. त्यामुळे या रुग्णांना दिव्यांग दर्जा देऊन केंद्र व राज्य शासनाच्या दिव्यांगांना मिळणाऱ्या सवलती आणि आरोग्यविषयक सवलती मिळण्यासाठी ही संस्था प्रयत्न करीत आहे.

आंदोलनाचा इशारा
कीर्तिकर यांनी हा विषय अनेकदा सरकार दरबारी मांडला आहे. त्यामुळे केंद्रीय आरोग्यमंत्री मनसुख मांडविय यांनी १८ डॉक्टरांची समिती स्थापन केली. या समितीने या रुग्णांना दिव्यांग दर्जा देण्याची शिफारस केली. तरीही अद्याप सामाजिक न्याय मंत्रालय या रुग्णांना दिव्यांग दर्जा देत नाही. त्यामुळे हा निर्णय त्वरेने घ्यावा अन्यथा सर्वोच्च न्यायालयात जनहित याचिका दाखल केली जाईल. तसेच तीव्र आंदोलन केले जाईल, असा इशारा कीर्तिकर यांनी दिला आहे.