परदेशात ही पर्यावरण पुरक बाप्पा मुर्तीला मागणी

परदेशात पर्यावरणपूरक बाप्पाला मागणी
अमेरिका आणि स्विझर्लंडध्ये मूर्ती रवाना
तुर्भे, ता. १८ (बातमीदार) ः भारतात पर्यावरणपूरक गणेशोत्सव साजरा करण्याकडे कल वाढत आहे. तसाच आता परदेशातही पर्यावरणपूरक बाप्पांच्या मूर्त्यांना मागणी वाढत आहे. वाशीतील सद्‍गुरू आर्टतर्फे अमेरिका आणि स्विझर्लंडमध्ये बाप्पाच्या मूर्ती पाठवण्यात आल्या असून, परदेशातील गणेशभक्तांनी यावर समाधान व्यक्त केले आहे.
गणेशोत्सव सण काही दिवसांवर येऊन ठेपला आहे. त्यामुळे गणेशमूर्तींवर अखेरचा हात फिरवण्यासाठी कारागिरांची लगबग सुरू आहे. गणेशोत्सवाचा उत्साह महाराष्ट्राप्रमाणेच सातासमुद्रापारदेखील पाहायला मिळतो. रोजगार, नोकरीनिमित्त अनेक भारतीय आज परदेशात स्थायिक झाले आहेत. तरीही त्यांनी आपली संस्कृती परदेशातही जपली आहे, तर भारताप्रमाणेच परदेशातही पर्यावरणपूरक बाप्पाच्या मूर्तींच्या मागणीत वाढ होत असल्याचे चित्र आहे. त्यामुळे मुंबई आणि कोकणातील अनेक भागातून परदेशात बाप्पांच्या मूर्ती रवाना होतात.

मूर्ती परदेशात दाखल
वाशीतील सद्गुरू आर्ट यांच्या वतीनेदेखील दरवर्षी पर्यावरणपूरक अशा कागदी आणि शाडू मातीच्या मूर्ती परदेशात उपलब्ध करून दिल्या जातात. यंदादेखील त्यांच्या शाडू मातीने बनवलेल्या मूर्तींना अमेरिका आणि स्विझर्लंड येथून मागणी आहे. या मूर्ती निश्चितस्थळी सुखरूप पोहोचल्याची माहिती सद्गुगुरू आर्टचे पंकज घोडेकर यांनी दिली आहे.