कल्याण-डोंबिवली पावसाची संततधार
कल्याण-डोंबिवलीत पावसाची संततधार
सकाळ वृत्तसेवा
डोंबिवली, ता. १८ : मागील दोन-तीन दिवसांपासून कल्याण-डोंबिवलीसह ग्रामीण भागात पावसाची संततधार सुरू आहे. पावसाच्या संततधारेमुळे बाजारपेठा ओस पडल्या आहेत. सोमवारी (ता. १८) सकाळपासून पावसाचा जोर काहीसा जास्त असल्याने अनेक शाळा सोडून दिल्या, तर दुपारच्या सत्रातील शाळांना सुट्टी जाहीर केली. रस्त्यांवरील खड्डे आणि साचलेल्या पाण्यामुळे तसेच मुंबईत पावसाचा जोर जास्त असल्याने चाकरमानी अडकून पडतात. यामुळे काही चाकरमान्यांनी घरीच राहणे पसंत केले.
शनिवारपासून कल्याण-डोंबिवलीत पावसाची संततधार सुरू आहे. गोकुळाष्टमीची सुट्टी असल्याने शनिवारी व रविवारी सुट्टीच्या दिवशी पावसाचा फारसा परिणाम जाणवला नाही. सोमवार सकाळपासूनच पावसाच्या जोरदार सरी शहरात बरसत आहेत. पावसाचा जोर फारसा नसल्याने चाकरमानी कामावर जाण्यासाठी निघाले तसेच सकाळच्या सत्रातील शाळादेखील नेहमीप्रमाणे भरल्या; मात्र दुपारी १२ च्या दरम्यान पावसाचा जोर वाढण्यास सुरुवात झाली. त्यातच मुंबईत सकाळपासूनच पावसाचा जोर असल्याने त्याचा परिणाम मध्य रेल्वेवर होऊ लागला होता. लोकल उशिराने धावत होत्या. पावसाचा अंदाज घेत अनेक चाकरमानी अर्ध्या वाटेवरून घरी परतले, तर काही चाकरमानी दुपारच्या वेळी कार्यालयातून घरी जाण्यासाठी निघाले. शाळा प्रशासनानेदेखील दुपारच्या सत्रातील शाळांना सुट्टी जाहीर केली.
डोंबिवलीत मानपाडा, टिळकपथ, एमआयडीसी पश्चिमेला महात्मा फुले रोड, सुभाष रोड, दीनदयाळ रोडसह कोपर आणि कुंभारखाना पाडा आदी भागात वाहतूक मंदावली होती. सुभाष रस्त्यावर खड्डे असल्याने रिक्षा वाहतूक आणि दुचाकींची अडचण झाली होती, नागरिकांना त्याचा खूप त्रास झाला. ठिकठिकाणी पावसाच्या पाण्यामुळे डबके झाल्याने वाहनांना खड्ड्यांचा अंदाज आला नाही. त्यामुळेही विद्यार्थी, आबालवृद्धांना मार्ग काढताना त्रास झाला. बाजारपेठेमध्येही शुकशुकाट पसरला होता.
नागरिकांची धावपळ
कल्याणमध्येही पूर्वेला चक्की नाका, तिसगाव यांसह तिसाई परिसर आदी भागात पावसाचे पाणी साचले असल्याने तेथे वाट काढताना पादचारी, वाहनचालक आदींना अडथळे आले. शिवाजी चौकात नेहमीप्रमाणे वाहतूक कोंडी झाली होती, भाजी मार्केट परिसरात वर्दळ होती, परंतु पावसामुळे धंद्याला तेजी नसल्याचे सांगण्यात आले. स्थानक परिसरात रिक्षा पकडण्यासाठी नागरिकांची धावपळ झाली. अपेक्षित ठिकाणी रिक्षा यायला तयार नसल्याने प्रवाशांची पंचाईत झाली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.