ठाण्यातील काही भागात पाणीबाणी

ठाण्यातील काही भागांत पाणीकपात
ठाणे, ता. १९ : महाराष्ट्र औद्योगिक विकास महामंडळाच्या जलपुरवठा योजनेअंतर्गत येणाऱ्या जांभूळ जलशुद्धीकरण केंद्रात अत्यंत महत्त्वाची देखभाल व दुरुस्तीचे काम गुरुवारी (ता. २१) दुपारी बारापासून सुरू होऊन शुक्रवारी (ता. २२) दुपारी बारा वाजेपर्यंत चालेल. त्यामुळे ठाणे शहरातील काही भागांमध्ये २४ तास पाणीपुरवठा पूर्णपणे बंद राहणार आहे. या काळात ठाणे महापालिकेच्या दिवा प्रभाग समितीचा संपूर्ण भाग, मुंब्रा प्रभाग समिती प्रभाग क्र. २६ व ३१ वगळता उर्वरित सर्व भाग, कळवा प्रभाग समिती संपूर्ण भाग, वागळे प्रभाग समिती रूपादेवी पाडा, किसननगर क्रमांक दोन, नेहरूनगर, मानपाडा प्रभाग समिती कोलशेत खालचा गाव येथे पाणीपुरवठा खंडित होईल. पाणीपुरवठा सुरू झाल्यानंतर पुढील एक ते दोन दिवस तो कमी दाबाने येईल, अशी माहिती महापालिकेच्या पाणीपुरवठा विभागाने दिली आहे.
महापालिकेने नागरिकांना पाणीकपातीच्या काळात पाण्याचा वापर काटकसरीने करण्याचे आवाहन केले आहे. तसेच आवश्यक तेवढा पाणीसाठा करून ठेवावा व महापालिकेला सहकार्य करावे, असेही सांगितले आहे.