फुकट्या प्रवाशांना दणका

नवी मुंबई, ता. १९ (वार्ताहर) : गणेशोत्सवाच्या पार्श्वभूमीवर कोकण रेल्वेमार्गावर तिकीट तपासणी मोहीम अधिक तीव्र करण्यात आली आहे. या मोहिमेअंतर्गत ४०,६०२ प्रवाशांकडून दोन कोटी ३७ लाख ११ हजारांचा दंड वसूल करण्यात आला आहे.
कोकण रेल्वे मार्गावर प्रवाशांची गर्दी वाढणार आहे. त्यामुळे प्रवाशांनी वैध तिकिटासोबतच प्रवास करावा, असे आवाहन प्रशासनाने केले आहे. तसेच प्रवासादरम्यान कोणत्याही प्रकारचा त्रास होऊ नये, यासाठी सुरक्षा आणि सोयीसुविधांवर विशेष लक्ष दिले जात आहे. याचबरोबर विनातिकीट प्रवासाला आळा घालण्यासाठी तसेच आरामदायी प्रवासासाठीही मोहीम राबवण्यात येत असून आतापर्यंत ३,७६५ तिकीट तपासणी मोहिमा घेण्यात आल्याची माहिती कोकण रेल्वेचे मुख्य जनसंपर्क अधिकारी सुनील नारकर यांनी दिली आहे.