ज्येष्ठ अभिनेते अच्युत पोतदार यांचे निधन

ज्येष्ठ अभिनेते अच्युत
पोतदार यांचे निधन
ठाणे, ता. १८ : ज्येष्ठ अभिनेते अच्युत पोतदार (वय ९१) यांचे ठाण्यातील ज्युपिटर रुग्णालयात सोमवारी रात्री निधन झाले. त्यांच्या पश्चात दोन मुली, एक मुलगा, जावई आणि नातवंडे असा परिवार आहे. त्यांच्या पार्थिवावर मंगळवारी अंत्यसंस्कार होणार आहे. पोतदार यांनी १२५ पेक्षा अधिक बॉलिवूड चित्रपटांमध्ये, ९५ दूरदर्शन मालिका, २६ नाटके आणि ४५ जाहिरातींमध्ये अभिनय केला आहे.
मध्य प्रदेशातील जबलपूर येथे २२ ऑगस्ट १९३४ रोजी एका मराठी ब्राह्मण कुटुंबात जन्मलेल्या पोतदार हे अर्थशास्त्रात पदव्युत्तर पदवीपर्यंत शिक्षण घेतले. सुरुवातीला त्यांनी रीवा येथे प्राध्यापक म्हणून काम केल्यानंतर लष्करात दाखल झाले. १९६७ मध्ये कॅप्टन पदावरून निवृत्त झाल्यानंतर २५ वर्षे ते इंडियन ऑईलमध्ये नोकरी केली. नोकरीदरम्यान ते सांस्कृतिक कार्यक्रम व नाट्यप्रयोगांमध्ये सक्रियपणे सहभागी होत. अभिनय हा त्यांचा छंद असल्यामुळे त्यांनी कधीही भूमिकांसाठी आग्रह धरला नाही; जेवढ्या भूमिका त्यांच्या वाट्याला आल्या त्या त्यांनी सहजतेने स्वीकारल्या. त्यांनी ३ इडियट्स, फेरारी की सवारी, दबंग २, लगे रहो मुन्ना भाई, परिणीता, हम साथ साथ हैं, वास्तव, रंगीला, ये दिल्लगी, तेजाब, अर्ध सत्य आणि परिंदा या चित्रपटात काम केले. याशिवाय भारत एक खोज, प्रधानमंत्री, शुभ मंगल सावधान, आंदोलन, अमिता का अमित, मिसेस तेंडुलकर, आहट, अगले जनम मोहे बिटिया ही किजो, माझा होशील ना आणि वागळे की दुनिया अशा मालिकांमध्ये लक्षवेधी भूमिका साकारल्या. आतापर्यंत त्यांना अनेक पुरस्कारांनी सन्मानित करण्यात आले.