सहाय्यक पोलिस आयुक्तांचा पदभार जाहीर

सकाळ वृत्तसेवा
ठाणे, ता. १९ : ठाणे शहर पोलिस आयुक्तालयात नव्याने हजर झालेल्या आठ सहाय्यक पोलिस आयुक्तांचा विभागनिहाय पदभार जाहीर करण्यात आला आहे. तसेच चार सहाय्यक पोलिस आयुक्तांची बदली अन्य विभागांत करण्यात आली आहे. १२ जणांना गुन्हे, आर्थिक, वाहतूक, प्रशासन आदी विभागांचा पदभार देण्यात आला आहे. यात नव्याने हजर झालेले किरण बाळासाहेब बालवडकर यांच्या खांद्यावर कल्याण वाहतूक विभागासह उल्हासनगर वाहतूक विभागाची अतिरिक्त जबाबदारी देण्यात आलेली आहे.
ठाणे शहर आयुक्तालयांतर्गत असलेल्या नौपाडा विभागाच्या सहाय्यक पोलिस आयुक्त प्रिया डमाले यांची कळवा विभागात, उल्हासनगर वाहतूक विभागाचे विजय पवार यांची विशेष शाखा ३ येथे, तर कल्याण वाहतूक शाखेचे संजय साबळे यांची मुख्यालय २, याशिवाय प्रशासन विभागाचे सहाय्यक पोलिस आयुक्त संध्या भिसे यांची वागळे इस्टेट वाहतूक विभागात बदली केली आहे. याचबरोबर नव्याने हजर झालेले संभाजी जाधव यांची नौपाडा विभाग, विजय मराठे यांची भिवंडी पश्चिम विभाग, दीपाली खन्ना यांची वागळे इस्टेट विभाग, रवींद्र दौंडकर यांची गुन्हे शाखा (प्रतिबंधक), नीलिमा पवार यांची विशेष शाखा १, अंजली भोईर ठाणे वाहतूक विभाग, सुरेखा कपिले यांची प्रशासन विभागात आणि किरण बालवडकर यांच्यावर कल्याण वाहतूक विभागाची जबाबदारी सोपवली आहे. या व्यतिरिक्त बालवडकर यांना उल्हासनगर वाहतूक विभागाचा अतिरिक्त कार्यभारही देण्यात आलेला आहे. या आदेशावर ठाणे पोलिस दलातील मुख्यालय १ चे पोलिस उपायुक्त डॉ. श्रीकांत परोपकारी यांची स्वाक्षरी असून संबंधित सहाय्यक पोलिस आयुक्तांना तत्काळ त्यांच्या नवीन पदाच्या ठिकाणी हजर होऊन कार्यभार स्वीकारण्याबाबत नमूद केले आहे.