भिवंडीत अल्पवयीन दोघांचे अपहरण

भिवंडीत अल्पवयीन मुलांचे अपहरण
युवकासह अज्ञातावर गुन्हा दाखल
भिवंडी ता. २५ (वार्ताहर) : शहरात अल्पवयीन मुलामुलींच्या अपहरणाच्या घटनांमध्ये वाढ होत आहे. त्यातच आणखी दोन अल्पवयीन मुलांच्या अपहरणाच्या घटना दोन वेगवेगळ्या परिसरात घडल्या आहेत. याप्रकरणी दोन पोलिस ठाण्यात एका युवकासह अज्ञातावर गुन्हा दाखल केला आहे. यातील पहिल्या घटनेत भिवंडी बायपास परिसरातील रांजनोली येथे राहणारी १६ वर्षीय मुलगी २३ ऑगस्ट रोजी पहाटे ४ वाजताच्या सुमारास घरातून रागातून निघून गेली आहे. दरम्यान, तिचे अपहरण मुरतूज राजेसाहेब पिरजादे (२०) ह्याने केल्याच्या संशयावरून त्याच्याविरोधात कोनगाव पोलिस ठाण्यात गुन्हा दाखल केला आहे, तर दुसऱ्या घटनेत २० ऑगस्ट रोजी पहाटे साडेचारच्या सुमारास मोहम्मद अनस मोहम्मद हुसेन अन्सारी (१५) हा घरातून निघून गेला होता. त्यानंतर घरच्यांनी त्याला कॉल केला. त्या वेळी त्याने बाथरूमला गेल्याचे सांगितले; मात्र तो रात्री उशिरापर्यंत घरी परतला नाही. घरच्यांनी त्याचा दोन दिवस शोध घेऊनही तो न सापडल्याने अखेर शनिवारी (ता. २३) हुसेनचे कोणीतरी अज्ञाताने अपहरण केल्याच्या संशयावरून अज्ञाताविरोधात भोईवाडा पोलिस ठाण्यात गुन्हा दाखल केला आहे.