टाळ, मृदंगाने मंगलमय अनुभूती

टाळ, मृदंगाने मंगलमय अनुभूती
पोयनाड परिसरात गणेशोत्सवाची धामधूम
पोयनाड, ता. २८ (वार्ताहर) : महाराष्ट्राचा वैभवशाली उत्सव म्हणून ओळखला जाणारा गणेशोत्सव मोठ्या उत्साहात सुरू झाला आहे. महिनाभरापासून पोयनाड परिसरासह पंचक्रोशीत वाद्यनिर्मितीच्या कामाला वेग आला होता. आता घराघरात ही वाद्ये भक्तिभावाने दररोज दुमदुमणार आहेत.
वाद्यनिर्मितीसाठी लागणारे चामडे, शाई, ओड, लाकूड आदींच्या दरात वाढ झाली असली तरी ग्राहक आणि भजनप्रेमींचा ओढा पारंपरिक वाद्यांकडेच आहे. भजनाची खरी रंगत ही तबला, मृदंग, टाळ-झांज यांच्या सुरेल साथीतच खुलते, असे स्थानिक वाद्यनिर्मात्यांचे म्हणणे आहे. आधुनिकतेच्या लाटेतही परंपरेला मागणी कायम आहे. गणेशोत्सवाच्या काळात केवळ भजनी मंडळेच नव्हेतर हरिपाठातही मृदंगाला विशेष महत्त्व असते.
--------------------------
पारंपरिक वाद्यांचा गजर
़ःपारंपरिक वाद्यांमध्ये पेटी, ढोलकी, तबला, पखवाज, मृदंग, टाळ, झांज, चिपळ्या, संबळ, दिंडी, ढोलक वाद्यांचा प्रमुख समावेश होतो. पोयनाड परिसरात प्रासादिक, शास्त्रीय पद्धतीची भजने, घरगुती भजनी मंडळे तसेच ग्रामस्थ मंडळांच्या भजनांमध्ये वाद्यांचा वापर अधिक प्रमाणात होतो.
------------------------------
वाद्यातून सांस्कृतिक ओळख
ःःःगणेशोत्सव फक्त सण नाहीतर परंपरा, अध्यात्म आणि भक्तिभावाचा संगम आहे. ढोलकीचा ठेका, पखवाजाचा गजर, टाळ-झांजांच्या निनादात गावोगावची भजनी मंडळे एकत्र येतात. आधुनिकतेच्या झगमगाटात पारंपरिक वाद्यातून वारसा सांस्कृतिक ओळख ठळकपणे जपताना दिसतात.