कागदाच्या लगद्याचा पर्यावरणपूरक गणेश

पनवेल, ता. ३० (प्रतिनिधी) : पनवेलमधील मानाचा गणपती म्हणून टपालनाक्यावरील शनी मंदिरातील श्री गणेश मित्र मंडळाचा गणेशोत्सव प्रसिद्ध आहे. १९६३ साली या मंडळाची स्थापना झाली असून या गणेशोत्सवाचे यंदा ६३वे वर्ष आहे.
धार्मिक आणि प्रबोधनपर देखावे मंडळाचे वैशिष्ट असून मंडळाने तब्बल ५० किलो वजनाची आठ फूट उंच कागदापासून बनवलेली मूर्ती स्थापन केली. या गणपतीचे विसर्जन साध्या पद्धतीने पारंपरिक वाद्यांच्या गजरात कोळीवाड्यातील जलाशयात केले जाते. विसर्जनावेळी मंडळातील कार्यकर्ते, भक्त पारंपरिक वेशभूषेत सहभागी होतात. पर्यावरणपूरक उपक्रमांमुळे नवी मुंबई महापालिका, पोलिस विभाग, रोटरी क्लब तसेच जिल्हास्तरावर पुरस्कारांनी गौरवण्यात आल्याची माहिती मंडळाचे अध्यक्ष सुनील खळदे यांनी दिली.