कल्याणमध्ये डॉ. श्री नानासाहेब धर्माधिकारी प्रतिष्ठानकडून २३ हजार किलो ''निर्माल्याचे'' संकलन

कल्याणमध्ये २३ हजार किलो निर्माल्याचे संकलन
कल्याण, ता. ९ (वार्ताहर) : डॉ. नानासाहेब धर्माधिकारी प्रतिष्ठानतर्फे व महाराष्ट्र भूषण, पद्मश्री डॉ. आप्पासाहेब धर्माधिकारी आणि डॉ. सचिन धर्माधिकारी यांच्या मार्गदर्शनाखाली निर्माल्याचे संकलन करण्यात आले. ८०० हून अधिक सदस्यांच्या मार्फत २३ हजार किलो निर्माल्य गोळा करण्यात आले आणि त्यातून खतनिर्मितीचे महत्त्वपूर्ण कार्य पार पडले.
दीड दिवस, सात दिवस व १० दिवसांच्या गणपती विसर्जनामध्ये कल्याणमधील नांदिवली, गणेश घाट-दुर्गाडी, नवीन गणेश घाट-कोनगाव, गौरीपाडा तलाव, म्हारळ सोसायटी रिजेन्सी, टिटवाळा या ठिकाणी हे निर्माल्य संकलनाचे करण्यात आले. प्रतिष्ठानच्या सदस्यांनी या निर्माल्यामधून धागे, दोरे, प्लॅस्टिक, कागद आणि इतर अनावश्यक वस्तू बाजूला करण्याचे काम केले. त्यातून फक्त फुले वेगळी करून ती गोण्यात जमा केली. जमा झालेल्या पाकळ्यांपासून गांडूळखत तयार केले जाते. हे तयार झालेले खत प्रतिष्ठानमार्फत लावण्यात आलेल्या झाडांना पुरवले जाते.
आप्पासाहेब धर्माधिकारी आणि सचिन धर्माधिकारी यांच्या मार्गदर्शनाखाली अनेक समाजपयोगी कार्य करत आहे. बैठकीच्या माध्यमातून अंधश्रद्धा निर्मूलन, बालसंस्कार मार्गदर्शन, जल पुनर्भरण, स्वच्छता अभियान आणि विहीर व तलावांची स्वच्छता, आरोग्य शिबिर, रक्तदान शिबिर यांचा समावेश आहे. या प्रतिष्ठानचे कार्य फक्त भारतातच नाही, तर अमेरिका, कॅनडा, ऑस्ट्रेलिया, सिंगापूर, नॉर्वे, दुबई आणि कतारसारख्या अनेक देशांमध्ये सुरू आहे.