४ हजार ७८३ तृतीयपंथीयांना ओळखपत्र, शिक्षण आणि विकासासाठी जिल्हानिहाय सर्वेक्षण

साडेचार हजार तृतीयपंथींना ओळखपत्र
शिक्षण आणि विकासासाठी जिल्हानिहाय सर्वेक्षण
मुंबई, ता. १० : समाजातील तृतीयपंथींना मुख्य प्रवाहात आणण्यासाठी शिक्षण, आरोग्य आणि रोजगारात समान संधी मिळावी, यासाठी आतापर्यंत चार हजार ७८३ तृतीयपंथींना ओळखपत्र जारी करण्यात आले. उर्वरित ओळखपत्र लवकरच जारी करण्यात येणार असल्याची माहिती सामाजिक न्याय राज्यमंत्री माधुरी मिसाळ यांनी दिली. तसेच तृतीयपंथींच्या शिक्षण आणि विकासासाठी जिल्हानिहाय सर्वेक्षण करण्याचेही निर्देशही त्यांनी आज दिले.
राज्यात आतापर्यंत तृतीयपंथींना तीन हजार ९०१ आधार कार्ड, तर एक हजार २४० आयुष्मान कार्ड प्रदान करण्यात आली. उर्वरित तृतीयपंथींना आयुष्मान कार्ड लवकरच वितरित करण्यात येणार आहेत. आरोग्य, उच्च शिक्षण, व्यवसाय करण्याचा समान हक्क त्यांना मिळावा, यासाठी शासन प्रयत्नशील आहे. तृतीयपंथींसाठी योजनांची अंमलबजावणी प्रभावीपणे करण्यासाठी समन्वय अधिकाऱ्याची नेमणूक करावी. प्रत्येक जिल्ह्यात तक्रार निवारणासाठी जिल्हास्तरीय तक्रार समिती तसेच राज्यस्तरीय तृतीयपंथी संरक्षण कक्ष स्थापन करून समन्वयासाठी अधिकारी नेमावे. मुंबईसह राज्यात विभागीय कार्यालय स्थापन करून रोजगार व प्रशिक्षणासंबंधी योजना राबविण्याची कार्यवाही गतीने करण्याचे निर्देशही राज्यमंत्री माधुरी मिसाळ यांनी दिले.