काळू नदीत दोन बहिणी बुडल्याची घटना

काळू नदीत बुडालेल्या दुसऱ्या बहिणीचा मृतदेह हाती
कल्याण, ता. १० (वार्ताहर) : टिटवाळा येथील काळू नदीत कपडे धुण्यासाठी गेलेल्या दोन सख्ख्या बहिणींचा बुडून दुर्दैवी मृत्यू झाल्याची घटना मंगळवारी (ता. ९) दुपारी घडली. मांडा पश्चिम येथील गणेशनगरमध्ये राहणाऱ्या रिया अन्सारी (वय १८) आणि सिना अन्सारी (वय ९) या दोन बहिणी मंगळवारी दुपारी काळू नदीवर कपडे धुण्यासाठी गेल्या होत्या. नदीतील पाण्याचा अंदाज न आल्याने दोघीही बुडाल्या. घटनेची माहिती मिळताच अग्निशमन दलाने बचावकार्य सुरू केले. त्याच दिवशी रिया अन्सारीचा मृतदेह अग्निशमन दलाला सापडला, तर सिना अन्सारीचा मृतदेह तब्बल २८ तासांनंतर आधारवाडी अग्निशमन दलाच्या शोधकार्यादरम्यान गंधारी खाडी परिसरात सापडला.