तळोजामध्ये गुंड राजकुमार म्हात्रे याच्यावर हल्ला

तळोजामध्ये गुंड राजकुमार म्हात्रेवर हल्ला
पनवेल, ता. १० (वार्ताहर) : तळोजा खुटारी परिसरात जुन्या जागेच्या वादातून गुंड राजकुमार म्हात्रे आणि त्याच्या साथीदारांवर जीवघेणा हल्ला झाल्याची घटना नुकतीच घडली. याप्रकरणी पोलिसांनी अनिकेत म्हात्रे आणि त्याच्या १३ साथीदारांविरोधात खुनाच्या प्रयत्नासह आर्म ॲक्टअंतर्गत गुन्हा दाखल करून त्यांचा शोध सुरू केला आहे.
५ सप्टेंबर रोजी राजकुमार म्हात्रे आणि सूरज म्हात्रे हे दोघे बैलांसंबंधी चर्चा करीत असताना, फॉर्च्युनर, थार आणि काळ्या रंगाच्या गाड्यांमधून अनिकेत म्हात्रे त्याच्या साथीदारांसह तिथे आला. त्याने राजकुमारला ‘तू भाई झालास का?’ असे विचारून हवेत दोन गोळ्या झाडल्या. त्यानंतर १३ जणांच्या टोळक्याने हॉकी स्टिक, तलवार, लोखंडी रॉड आणि लाकडी दांडक्यांनी राजकुमार म्हात्रे आणि त्याला वाचवण्यासाठी गेलेल्या सूरज म्हात्रेवर हल्ला करून त्यांना गंभीर जखमी केले.
हल्ल्यानंतर सर्व आरोपी घटनास्थळावरून फरार झाले. पोलिसांनी अनिकेत म्हात्रे, प्रणीत म्हात्रे, शैलेश म्हात्रे, प्रतीक म्हात्रे, अनिश म्हात्रे, मोनीश म्हात्रे, किरण म्हात्रे, भावेश म्हात्रे, वीरेंद्र म्हात्रे, बंटी म्हात्रे आणि निखिल भोईर यांच्यासह इतर अज्ञात आरोपींचा शोध सुरू केला आहे. या हल्ल्यात जखमी झालेल्या राजकुमार आणि सूरज म्हात्रे यांच्यावर रुग्णालयात उपचार सुरू आहेत.