सीसीटीव्ही कॅमेऱ्यांना कमानींना अडसर

सीसीटीव्ही कॅमेऱ्यांना कमानींचा अडसर
कल्याण, ता. ११ (बातमीदार) : महापालिकेने स्मार्ट सिटीअंतर्गत शहरातील सर्व नाके, चौकांवर सीसीटीव्ही कॅमेरे बसवले आहेत. हे कॅमेरे पोलिसांना फायदेशीर ठरत आहेत. या कॅमेऱ्यांमुळे गुन्हेगारांचा शोध घेणे सहज शक्य होते; मात्र कल्याण पूर्व पूना लिंक रोडवरील तिसगाव नाक्यावर उभारलेल्या एका कमानीने या कॅमेऱ्यांना झाकले असून, त्यामुळे परिसरातील सुरक्षेवर प्रश्नचिन्ह निर्माण झाले आहे.

पूना लिंक रोड हा २४ तास वर्दळीचा आणि महत्त्वाचा रस्ता आहे, ज्यावर अनेक गृहसंकुल, व्यापारी दुकाने, शोरूम, हॉटेल्स, दवाखाने, शाळा आणि रुग्णालये आहेत. या रस्त्यावरील कॅमेऱ्यांना अडथळा निर्माण करणाऱ्या या कमानीमुळे केडीएमसीचे कॅमेरे झाकले जाण्याची शक्यता असून, ही समस्या परिसरात चर्चेचा विषय बनली आहे. या रस्त्यावर अनेक अपघात होतात आणि कोणतीही अनुचित घटना घडल्यास ती सीसीटीव्ही कॅमेऱ्यांमुळे सहज टिपली जाते; मात्र कमानीमुळे छायाचित्रणात अडथळा येऊ शकतो, ज्यामुळे पोलिस यंत्रणेला या घटनांचा शोध घेणे कठीण होऊ शकतो.

पालिकेला रहिवाशांचे प्रश्न
कमानी उभारणीसाठी लागणारी परवानगी कशी आणि कोणाकडून मिळते, या कमानी उभारण्यासाठी कोणते निकष आणि नियम पाळले जातात, वाहतुकीला आणि सुरक्षा यंत्रणेला अडथळा निर्माण करणाऱ्या अशा कमानींसाठी का हरकत दाखवली जात नाही, असे प्रश्न परिसरातील रहिवाशांकडून महापालिकेला आणि प्रशासनाला विचारले जात आहेत.