वय - वादळ विजांच !" या विषयावर मनमोकळा संवाद..

‘वय वादळ विजाचं’ तरुणाई-पालक साधणार मुक्त संवाद
ठाणे, ता. ११ (बातमीदार) : सध्या तरुणांच्या जीवनशैलीत श्रमासह नैराश्याचे प्रमाण वाढताना दिसत आहे. प्रेम, करिअर, पालकांशी भांडण, नातेवाइकांशी नाती टिकवण्यासाठीची धडपड अशा सर्व विविध गोष्टी या नव्या पिढीसाठी मोठे संकट बनत आहे. याच अनुषंगाने ठाण्यात ‘वय वादळ विजांचं’ हा विशेष उपक्रम आयोजित करण्यात आला आहे. हा कार्यक्रम आई चिखलादेवी महिला मंडळ, स्वयंसिद्धा महिला चॅरिटेबल ट्रस्ट आणि रक्षक प्रतिष्ठानच्या वतीने आयोजित केला असून, पालक आणि युवकांनी या कार्यक्रमात सहभागी व्हावे, असे आवाहन आयोजकांच्या वतीने करण्यात आले आहे.
या कार्यक्रमात साहित्यिक आणि कवी प्रा. प्रवीण दवणे या कार्यक्रमाचे मार्गदर्शक म्हणून सहभागी होणार आहेत. प्रेम, करिअर आणि नातेसंबंध या जीवनातील महत्त्वाच्या तीन टप्प्यांवर युवक-पालकांमध्ये मोकळा संवाद साधण्यासाठी हा कार्यक्रम असणार आहे. ठाण्यातील नागरिकांनी या उपक्रमात मोठ्या संख्येने सहभागी व्हावे, असे आवाहन आयोजकांनी केले आहे.
हा संवादात्मक कार्यक्रम रविवारी (ता. १४) सायंकाळी ४.३० वाजता विठ्ठल मंदिर येथे होणार आहे. युवकांनी आपले प्रश्न थेट मांडावेत आणि पालकांनी त्यांना समजून घेण्याचा प्रयत्न करावा, या उद्देशाने हा उपक्रम राबवला जात आहे. कार्यक्रमाच्या आयोजनात पद्मजा नितीन पाटील, रूपाली हेमंत पाटील, वैशाली स्वप्नील लांडगे आणि कुणाल मालंदे पाटील हे समन्वयक म्हणून कार्यरत आहेत.