कॉम्रेड एम ए पाटील यांचे निधन

श्रमिक नेते कॉम्रेड एम. ए. पाटील यांचे निधन
सकाळ वृत्तसेवा
ठाणे, ता. ११ : अनेक श्रमिक संघटनांचे आधारस्तंभ आणि कामगार चळवळीतील ज्येष्ठ नेते कॉम्रेड मारुती आबा पाटील (एम. ए. पाटील) यांचं गुरुवारी (ता. ११) पहाटे अल्पशा आजाराने निधन झाले. वयाच्या ८४व्या वर्षी त्यांनी अखेरचा श्वास घेतला. त्यांच्या पश्चात मुलगा, सून आणि दोन नातवंडं असा परिवार आहे. त्यांच्या निधनामुळे कामगार चळवळीने एक मार्गदर्शक नेता गमावला, अशी भावना व्यक्त केली जात आहे.
कॉम्रेड पाटील यांनी आपले जीवन अंगणवाडी कर्मचारी संघ, बांधकाम कर्मचारी संघ तसेच वाळूउपसा आणि ऊसतोड कामगार अशा असंघटित कामगारांसाठी समर्पित केले. ‘सर्व श्रमिक संघ’ या माध्यमातून त्यांनी तळागाळातील शोषित कामगारांना एकत्र आणून त्यांना न्याय मिळवून दिला.
वय वाढलेलं असताना आणि अनेक आजार असतानाही त्यांनी आपले काम थांबवले नाही. कोरोना काळातही त्यांनी अंगणवाडी व आशा कर्मचाऱ्यांचे पगार वेळेवर सुरू ठेवण्यासाठी मंत्रालयात सातत्याने पाठपुरावा केला. गेल्या काही दिवसांपासून ते हृदयविकाराशी झुंज देत होते. अखेर गुरुवारी पहाटे त्यांची प्राणज्योत मालवली.
त्यांच्या पार्थिवावर शुक्रवारी (ता. १२) ठाण्यातील जवाहर बाग स्मशानभूमीत अंत्यसंस्कार केले जाणार आहेत. या वेळी त्यांना ‘अखेरचा लाल सलाम’ देण्यात येणार आहे. त्यांच्या निधनाने कामगार चळवळीत मोठी पोकळी निर्माण झाली आहे.