जितेश नायर चीन येथे झालेल्या एशियन कराटे रेफरी परीक्षेमध्ये उत्तीर्ण

एशियन कराटे रेफरी परीक्षेत जितेश नायर उत्तीर्ण
वाशी (बातमीदार) : चीनमध्ये नुकतेच पार पडलेल्या एशियन कराटे रेफरी परीक्षेत नवी मुंबईमधील जितेश नायर यांनी यश मिळवले आहे. या परीक्षेत एशियातील २०० पेक्षा अधिक कराटे रेफरी सहभागी झाले होते. जितेश नायर हे भारतातून या परीक्षेस गेलेले एकमेव उमेदवार होते.
ही परीक्षा एशियन कराटे फेडरेशनच्या मार्गदर्शनाखाली १ सप्टेंबर ते ४ सप्टेंबर या कालावधीत शावग्वान, चीन येथे पार पडली. कराटे क्षेत्रातील ही सर्वात कठीण आणि महत्त्वाची परीक्षा मानली जाते. जितेश नायर हे नवी मुंबईमधून पहिल्या कराटे रेफरी ठरले आहेत.
जितेश नायर यांना कराटे इंडिया ऑर्गनायझेशनचे अध्यक्ष हंशी भारत शर्मा यांनी मार्गदर्शन केले. याशिवाय कराटे असोसिएशन महाराष्ट्रचे अध्यक्ष शिहान सल्लाउद्दीन अन्सारी व सेक्रेटरी शिहान संदीप गाडे यांनी त्यांचे अभिनंदन केले आहे.