सहाय्यक आयुक्त गणेश पाटील निलंबित

सहाय्यक आयुक्त गणेश पाटील निलंबित
वसई-विरारमध्ये अनधिकृत बांधकाम पाडताना संरक्षण दिल्याचा फटका
नालासोपारा, ता. ११ (बातमीदार) : वसई-विरार महापालिकेचे आयुक्त मनोजकुमार सूर्यवंशी यांनी अनधिकृत बांधकामांबाबत निष्काळजीपणा आणि भूमाफियांना संरक्षण दिल्याबद्दल सहाय्यक आयुक्त गणेश पाटील यांना गुरुवारी (ता. ११) तत्काळ निलंबित केले. विरारफाटा येथील एका अनधिकृत औद्योगिक संकुलावर कारवाई करताना निष्काळजीपणा केल्याचा त्यांच्यावर आरोप आहे.
विरारमधील इमारत दुर्घटनेनंतर आयुक्तांनी सर्व विभागांना अनधिकृत बांधकामे थांबवून ती पाडण्याचे आदेश दिले होते. त्यानुसार विरारफाटा येथील ‘नॅचरल आइस्क्रीम’च्या मागे सुरू असलेल्या औद्योगिक गाळ्यांचे बांधकाम पाडण्याचे काम सुरू झाले; मात्र भूमाफियांनी रस्त्यावर ट्रक आणि गाड्या लावून कारवाईत अडथळे आणले. सहाय्यक आयुक्त गणेश पाटील यांनी हे अडथळे दूर करून कारवाई करणे अपेक्षित असताना, त्यांनी कर्तव्यात कसूर करून भूमाफियांना संरक्षण दिले, अशी तक्रार आयुक्तांपर्यंत पोहोचली.
या तक्रारीची गंभीर दखल घेत आयुक्त मनोजकुमार सूर्यवंशी यांनी लगेच गणेश पाटील यांच्या निलंबनाचे आदेश दिले. आयुक्तांच्या या कठोर कारवाईमुळे भूमाफियांना मदत करणाऱ्या इतर अधिकारी आणि कर्मचाऱ्यांमध्ये भीतीचे वातावरण पसरले आहे.