पनवेलमध्ये फायनान्स कंपनीचे ५.९० लाखांचे दागिपनवेलमध्ये फायनान्स कंपनीच्या दागिन्यांची लूट

पनवेलमध्ये फायनान्स कंपनीच्या दागिन्यांची लूट
पनवेल, ता. १२ (वार्ताहर) : कळंबोली फायनान्स कंपनीचे दागिने घेऊन पनवेल येथे जात असलेल्या तरुणाला दुचाकीस्वारांनी धमकावून त्याच्याजवळील पाच लाख ९० हजार रुपये किमतीचे दागिने लुटून पलायन केले. ही घटना गुरुवारी (ता. ११) सायंकाळी सायन-पनवेल मार्गावरील खांदा कॉलनी येथील रेल्वेपुलावर घडली. खांदेश्वर पोलिसांनी याप्रकरणी गुन्हा दाखल करून आरोपींचा शोध सुरू केला आहे.
शैलेश दिलीप कांबळे (वय ३५) हा पनवेलमधील एका फायनान्स कंपनीत चालक म्हणून कामाला आहे. शैलेश हा गुरुवारी दुपारी पनवेल येथून खांदा कॉलनी येथील फायनान्स कंपनीच्या कार्यालयात गेला होता. तेथून तो कळंबोली येथील शाखेत गेला, तेथून त्याने पाच लाख ९० हजार रुपये किमतीचे वेगवेगळ्या प्रकारचे दागिने घेतल्यानंतर तो दुचाकीने पनवेल येथील मुख्य शाखेत जात होता. या वेळी सायंकाळी पावणेपाच वाजण्याच्या सुमारास शैलेश हा खांदा कॉलनी रेल्वेपुलावर आला असता त्याच्या पाठीमागून आलेल्या दोघा लुटारूंनी शैलेश याला धमकावले. त्यानंतर त्याच्याजवळ असलेल्या दागिन्यांची पिशवी घेऊन पलायन केले. या प्रकारानंतर शैलेशने पनवेल येथील कार्यालय गाठून घडल्या प्रकाराची माहिती दिली. त्यानंतर फायनान्स कंपनीच्या मालकासह खांदेश्वर पोलिस ठाणे गाठून तक्रार दाखल केली.