बॅलेनृत्य कलाकार नरेश नारायण उसनकर यांचे निधन

नरेश नारायण उसनकर यांचे निधन
विरार, ता. १२ (बातमीदार) : आंतरराष्ट्रीय कीर्तीचे बॅले नृत्य कलाकार नरेश नारायण उसनकर (वय ८६) यांचे शुक्रवारी (ता. १२) वृद्धापकाळाने निधन झाले. त्यांच्या पश्‍चात मुलगा आणि चार मुली असा परिवार आहे.
नरेश उसनकर हे श्रीधर पारकर यांचे शिष्य होते. त्यांना उदय शंकर, पार्वतीकुमार, सचिन शंकर यांचे मार्गदर्शन लाभले. दशावतार, सिताहरण, संत रविदास, भगवान महावीर, भगवान गौतम बुद्ध अशा अनेक कलाकृती नृत्यातून साकारल्या. नृत्याचार्य उदय शंकर यांच्या शैलीचा अवलंब करून त्यांनी स्वतःची नृत्य शैली तयार केली होती. १९६८ मध्ये त्यांना पंतप्रधान इंदिरा गांधी, राष्ट्रपती वि. वी. गिरी, मार्शल टिटो यांचे हस्ते दिल्लीत सुवर्णपदकाने सन्मानित करण्यात आले. त्यांचे संपूर्ण कुटुंब नृत्यकलेत काम करत आहेत. नरेश उसनकर यांच्या निधनाबद्दल माजी महापौर नारायण मानकर, संत रोहिदास सामाजिक संस्थेचे अध्यक्ष व माजी स्थायी समिती सभापती संदेश जाधव, कला क्रीडा विकास मंडळाचे कार्याध्यक्ष प्रकाश वनमाळी यांनी शोक व्यक्त केला आहे. उसनकर यांच्यावर शुक्रवारी सायंकाळी बोरिवली येथील स्मशानभूमीत अंत्यसंस्कार करण्यात आले.