मासळी बाजारात शिळी मांसविक्री

भिवंडी, ता. १३ (वार्ताहर) : भिवंडी पालिका प्रभाग क्रमांक ५ अंतर्गत येणाऱ्या मुख्य बाजारपेठेतील मांस व मासळी बाजारात काही विक्रेते शिळे मांस व मासळी विकत असल्याचा दावा प्रहार जनशक्ती पक्षाचे अध्यक्ष भरत भोईर यांनी केला आहे. त्यांनी संबंधित विक्रेत्यांवर कठोर कारवाईसाठी भिवंडी महापालिकेचे आयुक्त अनमोल सागर यांना लेखी निवेदन सादर केले आहे.
शहरातील मुख्य मासळी व मटण बाजारात काही विक्रेते बोंबील, वाम यांसारख्या माशांना कृत्रिम रंग लावून आर्थिक फायद्यासाठी विक्री करत असून त्यामुळे ग्राहकांची फसवणूक होत असल्याचे भोईर यांनी स्पष्ट केले. तसेच तीनबत्ती परिसरातील चिकन विक्रेते सडलेले चिकन ३० ते ४० रुपये किलो या दराने चायनीज विक्रेत्यांना विकत असल्याची गंभीर बाबही त्यांनी समोर आणली. यामुळे नागरिकांना आजारांचा त्रास होत आहे. संबंधित शिळी व निकृष्ट दर्जाची मासळी आणि मांसविक्री करणाऱ्यांवर दंडात्मक कार्यवाही करून मच्छी मार्केट परिसरात स्वच्छता राखण्यासाठी नियमित स्वच्छता करण्यासाठी उपाययोजना करण्यात यावी. तसेच निकृष्ट दर्जाची मांस, मासळी विक्री करणाऱ्या विक्रेत्यांवर फौजदारी गुन्हे दाखल करावीत, अशी विनंती भरत भोईर यांनी निवेदनात केली आहे.

दुर्गंधीयुक्त पाणी
विक्रेत्यांकडून मांस व मच्छी धुण्यासाठी वापरलेले पाणी सार्वजनिक ठिकाणी रस्त्यावर फेकले जात असल्याने दुर्गंधी पसरत आहे. त्यामुळे नागरिकांचे आरोग्य धोक्यात आल्याचे त्यांनी नमूद केले.