रेल्वे स्थानकातून मोबाईल लंपास

रेल्वेस्थानकातून मोबाईल लंपास
ठाणे, ता. १३ : रेल्वेस्थानकातून एका प्रवाशाचा मोबाईल लांबविल्याची घटना समोर आली आहे. पुण्याला जाण्यासाठी गाडी नसल्याने ठाणे रेल्वेस्थानकावरील फलाट क्रमांक एकच्या बुकिंग हॉल येथे बसलेल्या उत्तर प्रदेश येथील रिझवान अन्सारी (वय १९) याला डुलकी लागली. याचा फायदा घेत चोरट्यांनी त्याचा ११ हजार ५०० रुपये किमतीचा मोबाईल लंपास केला. रिझवान हा पुणे स्वारगेट बसस्थानकाच्या बाजूला असलेल्या एका पावभाजीच्या गाडीवर काम करतो. तो गुरुवारी (ता. ११) पुण्याला जाण्यासाठी उत्तर प्रदेश ते ठाणे असा प्रवास करून रात्री पावणेबारा वाजण्याच्या सुमारास ठाण्यात उतरला; पण पुण्याला जाण्यासाठी पहाटे गाडी असल्याने तो फलाट क्रमांक एकला लागून असलेल्या तिकीट बुकिंग हॉल येथे जाऊन बसला. प्रवासात दमल्याने त्याला बसल्या जागी झोप लागली. त्या वेळी त्याने मोबाईल फोन पॅन्टच्या खिशात ठेवला होता. पाच वाजण्याच्या सुमारास जाग आल्यावर मोबाईल फोन मिळून आला नाही. म्हणून ११ हजार पाचशे रुपयांचा मोबाईल फोन कोणीतरी चोरी केल्याचे तक्रारीत नमूद केले. याप्रकरणी ठाणे लोहमार्ग पोलिस ठाण्यात गुन्हा दाखल करण्यात आला आहे.