पेझारीत भाजप महिला मोर्च्याचे काँग्रेसविरोधात निषेध आंदोलन

पेझारीत भाजप महिला मोर्चाचे काँग्रेसविरोधात निषेध आंदोलन
पोयनाड, ता. १४ (बातमीदार) : देशाचे पंतप्रधान नरेंद्र मोदी व त्यांच्या मातोश्रींवर अपमानकारक एआय व्हिडिओ तयार करून काँग्रेसने तो सोशल मीडियावर प्रसारित केल्याच्या निषेधार्थ भाजप महिला मोर्चा दक्षिण रायगड जिह्याच्या वतीने अलिबाग तालुक्यातील पेझारी येथे रस्त्यावर उतरून काँग्रेसच्या विरोधात जोरदार निषेध आंदोलन केले. या आंदोलनाचे नेतृत्व भाजप महिला मोर्चा जिल्हाध्यक्ष चित्रा पाटील यांनी केले.
याप्रसंगी खासदार धैर्यशील पाटील, आमदार प्रशांत ठाकूर, माजी आमदार पंडीत पाटील, आस्वाद पाटील, महेश मोहिते, राजेश मपारा, हेमा मानकर, सवाई पाटील, प्रीती पाटील, रश्मी वाजे, वंदना म्हात्रे, स्मिता पाटील, हेमा मानकर, कुंदा गावंड यांच्यासह महिला मोर्चा व कार्यकर्ते मोठ्या संख्येने उपस्थित होते. या वेळी बोलताना भाजप महिला मोर्चा जिल्हाध्यक्ष चित्रा पाटील म्हणाल्या, पंतप्रधान नरेंद्र मोदी हे जागतिक स्तरावरील सर्वात सक्षम नेतृत्व आहेत. त्यांनी जागतिक पातळीवर भारताचा ध्वज अभिमानाने उंचावला आहे. त्यांनी अनेक विषयात जगाचे मार्गदर्शन केले आहे. अनेक देशांचे ते प्रेरणास्थान आहेत आणि त्यांच्या मातोश्रींविषयी अशा प्रकारे निंदनीय व्हिडिओ तयार करणे हे केवळ काँग्रेसच्या राजकीय असंस्कृत स्थितीचे हे लक्षण आहे. एका अराजकीय आणि दिवंगत मातेचा अपमान करून भारतीय जनतेच्या भावना दुखवण्याचा कोणताही प्रयत्न भाजप महिला मोर्चा कधीही सहन करणार नाही. काँग्रेसच्या या कृतीचा सर्व महिलांनी संताप व्यक्त करत जोरदार शब्दात निषेध केले. स्थानिक नागरिकांनीही या आंदोलनाला पाठिंबा दर्शविला. शांततेत पार पडलेल्या या आंदोलनाच्या शेवटी भारतीय लोकशाहीचे मूल्य आणि नेत्यांच्या सन्मानाचे रक्षण करण्याची प्रतिज्ञा घेण्यात आली.