पिचकारी बहाद्दरांचा ‘प्रताप’

पिचकारी बहाद्दरांचा ‘प्रताप’
मिरा-भाईंदरमध्ये डबेवाल्याच्या पुतळ्याची विटंबना

सकाळ वृत्तसेवा
मुंबई, ता. १४ : मॅनेजमेंट गुरू अशी जगभरात ओळख असलेल्या मुंबईच्या डबेवाल्याचा पुतळा मिरा-भाईंदर पूर्व येथील बसथांब्यावर आहे. त्यावर पिचकारी बहाद्दर प्रवाशांनी पान-गुटखा खाऊन पिचकारी मारत घाण केली होती. त्याची दखल घेत मुंबई डबेवाला संघटनेच्या वतीने डबेवाल्यांनी रविवारी (ता. १४) हा पुतळा तसेच या परिसरात साफसफाई केली. दरम्यान, या अस्वच्छतेबाबत पालिकेला सांगूनही हा पुतळा स्वच्छ न केल्याने डबेवाल्यांकडून नाराजी व्यक्त केली जात आहे. ऊन, वारा, पावसाची तमा न बाळगता डबेवाल्यांकडून मुंबईकरांना इमानेइतबारे वेळेवर डबे पोहोचवण्याचे काम केले जाते. त्याची माहिती सर्वसामान्यांना व्हावी, म्हणून मिरा-भाईंदर पूर्व येथील ठाकूर माॅलनजीक असलेल्या बसथांब्यावर डबेवाल्याचा पूर्णाकृती पुतळा उभारला आहे, मात्र गेल्या काही दिवसांपासून काही पिचकारी बहाद्दरांनी हा पुतळा अस्वच्छ केल्याचे निदर्शनास येताच डबेवाल्यांनी पालिका प्रशासनाकडे पुतळा स्वच्छ करण्याची मागणी केली होती, मात्र पालिकेने त्याची दखल न घेतल्याने माऊली बच्चे, प्रकाश आंद्रे, दिनेश भारती, शांताराम आंद्रे, चंद्रकांत बच्चे यांनी हा पुतळा पाण्याने धुवून स्वच्छ केल्याचे मुंबई डबेवाला संघटनेचे अध्यक्ष उल्हास मुके यांनी सांगितले.