नालासोपा-यात रूमच्या स्लॅबचे प्लास्टर कोसळ

नालासोपाऱ्यात सदनिकेच्या स्लॅबचे प्लास्टर कोसळले
नालासोपारा, ता. १४ (बातमीदार) : फन फिस्ट यशवंत गौरव फेज टू परिसरातील ऑरेंज हाइट्स या नऊमजली इमारतीच्या पहिल्या मजल्यावरील सदनिका क्रमांक १०६मधील छताच्या स्लॅबचे प्लास्टर कोसळल्याची घटना रविवारी (ता. १४) सायंकाळी घडली. यामध्ये या घरातील १२ वर्षीय आयन गुप्ता हा मुलगा थोडक्यात बचावला. घटनेच्या वेळी या सदनिकेमध्ये निगा गुप्ता (वय ३१) आणि त्यांचा मुलगा आयन गुप्ता (वय १२) हे दोघेच उपस्थित होते. छताच्या प्लास्टरचा मोठा तुकडा कोसळताच आयनने तत्परतेने जागा बदलल्याने मोठी दुर्घटना टळली. या घटनेची माहिती मिळताच वसई-विरार महापालिकेच्या अधिकाऱ्यांनी घटनास्थळी धाव घेत पाहणी केली. प्राथमिक तपासात इमारतीच्या देखभालीतील निष्काळजीमुळे ही दुर्घटना घडल्याचे समोर येत आहे.