तर अधिकाऱ्यांना खड्ड्यात टाकू

...तर अधिकाऱ्यांना खड्ड्यात टाकू
कल्याणमध्ये शिवसेना शिंदे गटाचा इशारा
कल्याण, ता. १४ (वार्ताहर) : शहरातील रस्त्यांवरील खड्ड्यांबाबत नाराजी व्यक्त करीत शिवसेना शिंदे गटाचे कल्याण शहरप्रमुख रवि पाटील यांनी पालिकेच्या अधिकाऱ्यांना थेट इशारा दिला आहे. नवरात्र उत्सव सुरू होण्याआधी रस्त्यांवरील खड्डे भरले नाहीत, तर आम्ही अधिकाऱ्यांना त्या खड्ड्यात टाकू, असा इशारा त्यांनी दिला आहे.

किल्ले दुर्गाडी येथे होणाऱ्या नवरात्र उत्सवाच्या तयारीचा आढावा घेतल्यानंतर पाटील पत्रकारांशी बोलत होते. या वेळी त्यांनी रस्त्यांची झालेली दुर्दशा, गणेशोत्सवातही खड्डे न बुजवण्याची महापालिका प्रशासनाची भूमिका आणि येणाऱ्या नवरात्र उत्सवाच्या पार्श्वभूमीवर शहरात होणाऱ्या भाविकांच्या मोठ्या गर्दीचा उल्लेख केला. पाटील म्हणाले, की छत्रपती शिवाजी महाराजांच्या पदस्पर्शाने पावन झालेल्या दुर्गाडी किल्ल्यावर गेली ५० वर्षे शिवसेनेच्या माध्यमातून नवरात्र उत्सव साजरा केला जात आहे. या उत्सवात पाच लाखांहून अधिक भाविक दर्शनासाठी येतात. त्यामुळे शहरातील रस्त्यांची अवस्था सुधारली पाहिजे. या पत्रकार परिषदेला शिवसेना शिंदे गटाचे माजी नगरसेवक सुनील वायले, गणेश जाधव, सुनील खारूक, प्रतीक पेणकर, शहर संघटक नेत्रा उगले यांच्यासह अनेक पदाधिकारी आणि महिला कार्यकर्त्या उपस्थित होत्या.