कल्याण अवतीभवती

मुथा महाविद्यालयात ‘क्षितिज २०२५’ उत्सव
कल्याण (वार्ताहर) : शेठ हिराचंद मुथा महाविद्यालयात तीनदिवसीय आंतरमहाविद्यालयीन क्षितिज २०२५ स्पर्धेचे आयोजन करण्यात आले. या उत्सवात २५ महाविद्यालयांतील विद्यार्थ्यांनी सहभाग घेतला.
स्पर्धांमध्ये मेंदी, लिपन आर्ट, रॅप सिंगिंग, फेस पेंटिंग, ग्रुप डान्स तसेच बुद्धिबळ, कॅरम, व्हॉलीबॉल यांचा समावेश होता. प्रकाश मुथा यांच्या हस्ते उद्घाटन झाले. व्हॉलीबॉल स्पर्धेत वरिष्ठ गटात अग्रवाल महाविद्यालय, कनिष्ठ गटात मॉडेल कॉलेज डोंबिवली विजयी ठरले. रॅप सिंगिंगमध्ये आदित्य विश्वकर्मा (विद्यानिकेतन कॉलेज) तर सोप कार्विंगमध्ये रोहित सोरे (बिर्ला कॉलेज) विजेते ठरले.
पेन्सिल स्केचिंग, इन्स्ट्रुमेंटल मेलेडीज, लिपन कला यांमध्येही विविध महाविद्यालयांतील विद्यार्थ्यांनी चमकदार कामगिरी केली.
..................

खान्देश कुंभार समाजाचा स्नेहमेळावा
कल्याण (वार्ताहर): खान्देश कुंभार समाजाच्या वतीने कल्याण पश्चिमेतील सिद्धिविनायक हॉल येथे स्नेहमेळावा व विद्यार्थी गुणगौरव समारंभ पार पडला. या कार्यक्रमात समाजातील गुणवंत विद्यार्थी, सेवापूर्ती लाभार्थी, पदोन्नती प्राप्त बांधव यांचा सन्मान करण्यात आला. कार्यक्रमात सतिष दरेकर, रमाकांत क्षिरसागर, रसिका खेडकर आदी मान्यवर उपस्थित होते. दरेकर यांनी समाज संघटनाचे महत्त्व सांगितले. चित्रकला स्पर्धा, तसेच स्वरगंध मंडळाच्या भक्तिगीत सादरीकरणाने कार्यक्रम रंगतदार झाला. कार्यक्रमात काही सदस्यांना प्रदेश कार्यकारिणीत नियुक्तिपत्र प्रदान करण्यात आले.