माळशेज घाटात दरडी मधील दगड डोक्यावर पडल्याने एक पर्यटक मरण पावला तर दुसरा पर्यटक जखमी

माळशेज घाटात दरड कोसळून पर्यटकाचा मृत्यू
मुरबाड, ता. १५ (बातमीदार) : माळशेज घाटात दरड कोसळल्याने एका पर्यटकाचा मृत्यू झाला, तर एक जण जखमी झाल्‍याची घटना रविवारी (ता. १४) सायंकाळी घडली. जखमी पर्यटकाला उपचारासाठी पुणे येथे हलविण्यात आले आहे. बिनोद कुमार सिंह (वय २३) राहणार खराडी पुणे, मूळ गाव उत्तर प्रदेश असे या घटनेत मृत्यू झालेल्या तरुणाचे नाव आहे, तर अंशुमन मौर्य (वय २४) या तरुणाच्या पायावर दगड पडल्याने तो जखमी झाला आहे. पुणे येथून ४८ पर्यटकांचा एक गट रविवारी माळशेज घाटात वर्षा सहलीसाठी आला होता. घाटातील थितबी पॉइंटजवळ सायंकाळच्या सुमारास अचानक दरड कोसळण्याची घटना घडली. यामधील एक दगड थेट बिनोद कुमार सिंह यांच्या डोक्यावर पडला. यामध्ये त्याचा मृत्यू झाला. याप्रकरणी टोकावडे पोलिस ठाण्यात आकस्मित मृत्यूची नोंद करण्यात आली आहे. माळशेज घाटात संततधार पावसामुळे डोंगरावरील माती वाहून जात आहे. त्यामुळे येथील दगड मोकळे होऊन दरड कोसळण्याच्या घटना घडत आहेत. त्यामुळे पर्यटकांनी माळशेज घाटात फिरताना सावधानता बाळगण्याचे आवाहन प्रशासनाने केले आहे.