सळया पडल्याप्रकरणी मेट्रोच्या अधिकाऱ्यावर गुन्हा दाखल

कारवर सळ्या पडल्याप्रकरणी मेट्रोच्या अधिकाऱ्यावर गुन्हा
ठाणे, ता. १५ : घोडबंदर मार्गाहून ठाण्याच्या दिशेने जाणाऱ्या रस्त्यावर मेट्रोच्या पिलरवरील दोन ३२ एमएमच्या सळ्या एका चारचाकी गाडीवर पडल्याची घटना रविवारी (ता. १४) घडली होती. भिवंडी, काल्हेर येथे राहणारे अमित लाठे (वय ४७) हे त्यांच्या वडिलांना घेऊन कारमधून घरी जाताना ही घटना घडली. या घटनेत ते थोडक्यात बचावले, मात्र यामध्ये गाडीचे नुकसान झाले. याप्रकरणी जीवितास धोका निर्माण झाल्याप्रकरणी मेट्रोच्या सुरक्षा विभागाचे अधिकारी प्रतीक मोहिते यांच्याविरोधात गुन्हा दाखल करण्यात आला आहे. हा प्रकार रविवारी दुपारी सव्वादोन वाजण्याच्या सुमारास घडला. लाठे यांनी तेथील कंत्राटदार कर्मचाऱ्यांना जाब विचारल्यानंतर कापूरबावडी पोलिस ठाणे गाठले. लाठे यांच्या तक्रारीनुसार हा गुन्हा दाखल करण्यात आल्याची माहिती कापूरबावडी पोलिसांनी दिली.