स्विगी, झोमॅटो डिलिव्हरी बॉयजचे काम बंद आंदोलन

स्विगी, झोमॅटो डिलिव्हरी बॉयचे काम बंद आंदोलन

कल्याण, ता. १५ (वार्ताहर) : पलावामधील स्विगी, झोमॅटो या ऑनलाइन ॲपच्या माध्यमातून अन्न वितरण करणाऱ्या कंपनीतील कर्मचाऱ्यांनी (डिलिव्हरी बॉय) सोमवारी (ता. १५) अचानक काम बंद आंदोलन केले. त्यामुळे अन्न वितरण सेवेत मोठा अडथळा निर्माण झाला. गेले अनेक दिवस या कर्मचाऱ्यांना विविध विषयांवर व्यवस्थापनाकडून मनस्ताप सहन करावा लागत होता. याविरोधात कोणताही सकारात्मक प्रतिसाद त्यांना मिळाला नाही. त्यामुळे त्यांनी मनसेचे माजी आमदार राजू पाटील यांना एक निवेदन देत पुकारण्यात येणाऱ्या बंदला पाठिंबा देण्याची विनंती केली. त्यानंतर आंदोलकांनी काम बंद आंदोलन सुरू केले.

राजू पाटील यांनी आपल्या कार्यकर्त्यांना सूचना करीत हा विषय मार्गी लावण्यास सांगितले. त्यानुसार मनसेचे पदाधिकारी, कार्यकर्ते रस्त्यावर उतरले व संबंधित परिसरामध्ये कोणत्याही प्रकारची डिलिव्हरी होऊ देणार नाही, असा इशारा स्विगी झोमॅटोच्या व्यवस्थापकांना दिला. त्यानंतर ग्राहकांनी केलेली ऑनलाइन ऑर्डर वेळेत न मिळाल्याने अनेक ग्राहकांकडून तीव्र नाराजी व्यक्त केली. त्यानंतर स्विगी आणि झोमॅटोच्या व्यवस्थापकांनी घटनास्थळी धाव घेतली व रायडर्सच्या काही मागण्या मान्य केल्या आणि काही मागण्यांसाठी कालावधी मागितला आहे. चर्चा सकारात्मक होते हे लक्षात आल्यानंतर बंद तात्पुरता स्थगित करून संपूर्ण मागण्या मान्य होण्यासाठी १० दिवसांचा कालावधी देण्यात आला. येत्या १० दिवसांत मागण्या मान्य झाल्या नाहीत तर आंदोलन करू, असा इशारा मनसेने दिला. याप्रसंगी विधानसभा सचिव अरुण जांभळे, शहर संघटक तकदीर काळण, विभाग अध्यक्ष रोहित भोईर, उपविभाग अध्यक्ष राजेश काशीकर, विभाग सचिव पुष्पा भोरे, शाखा अध्यक्ष संतोष पांडे, विनोद चौधरी, प्रवीण बोऱ्हाडे तसेच इतर पदाधिकारी, कार्यकर्ते, महिला उपस्थित होते.