अ

विमानतळाचे नामकरणासाठी शिवसेनेचा मोर्चा
पनवेल, ता. १५ (बातमीदार) ः पनवेलमध्ये स्थानिक भूमिपुत्रांच्या मागण्या पूर्ण करण्यासाठी शिवसेनेने पुन्हा एकदा आक्रमक पवित्रा घेतला आहे. नवी मुंबई आंतरराष्ट्रीय विमानतळाला ‘लोकनेते दिवंगत दि. बा. पाटील’ यांचे नाव देण्यात यावे आणि प्रकल्पग्रस्त भुमिपुत्रांना व्यवसाय व नोकरीत प्रथम प्राधान्य मिळावे, अशी मागणी करत आज शिवसेनेच्या वतीने मोर्चा काढला जाणार आहे.
सकाळी १० वाजता छत्रपती शिवाजी महाराजांच्या अश्वारूढ पुतळ्याजवळ सर्व शिवसैनिक, युवासेना, महिला आघाडी, पदाधिकारी, कार्यकर्ते आणि नागरिक मोठ्या संख्येने एकत्र जमण्याचे आवाहन करण्यात आले आहे. त्यानंतर वाहनांचा ताफा नवी मुंबई आंतरराष्ट्रीय विमानतळाच्या दिशेने रवाना होणार आहे. शिवसेना नेते आणि केंद्रीय मंत्री अनंत गीते यांच्या नेतृत्वाखाली हा मोर्चा काढण्यात येणार असून, रायगड जिल्ह्यासह परिसरातील सर्व शिवसैनिक, युवासेना, महिला आघाडी, जिल्हा परिषद सदस्य, पंचायत समिती सदस्य, नगरसेवक, माजी नगरसेवक आणि पदाधिकाऱ्यांना मोठ्या संख्येने सहभागी होण्याचे आवाहन करण्यात आले आहे. शिवसेनेच्या या निदर्शन मोर्च्यात नव्या मुंबई विमानतळाच्या नामांतरासह स्थानिक भूमिपुत्रांसाठी रोजगार व व्यवसायात प्राधान्य देण्याची मागणी केली जाणार आहे. या मोहिमेत मोठ्या संख्येने शिवसैनिक उपस्थित राहावे, असे आवाहन करण्यात आले आहे.