प्रत्येक प्रभागात कबुतरखाना उभारणार

प्रत्येक प्रभागात कबुतरखाना उभारणार
मंगलप्रभात लाेढा यांचे सूताेवाच; नॅशनल पार्कमध्ये कबुतरखान्याचे उद्‌घाटन
सकाळ वृत्तसेवा
मुंबई, ता. १५ : दादर कबुतरखाना बंद करण्याच्या वादानंतर आता बोरिवलीतील संजय गांधी नॅशनल पार्क येथे नवीन कबुतरखान्याचे उद्‌घाटन रविवारी पालकमंत्री मंगलप्रभात लोढा यांच्या हस्ते करण्यात आले. आदिनाथ दिगंबर जैन मंदिरातर्फे ‘तीन मूर्ती पोदनपूर’ येथे उभारण्यात आलेल्या या कबुतरखान्यामुळे पक्षीप्रेमी आणि जैन समाजाने समाधान व्यक्त केले.
लोढा यांनी यापुढे प्रत्येक वॉर्डात अधिकृत कबुतरखाना सुरू करण्याचा विचार या वेळी व्यक्त केला.

कबुतरांमुळे होणाऱ्या आजारांमुळे शहरात कबुतरखान्यांना विरोध वाढला असून, प्रकरण न्यायालयात गेले आहे. उच्च न्यायालयाच्या आदेशानुसार, सध्या दादर कबुतरखाना बंद आहे आणि नियंत्रित पद्धतीने खाद्य घालण्याबाबत नागरिकांकडून हरकती व सूचना मागवण्यात आल्या आहेत. कबुतरखान्यांना स्थानिकांचा कडाडून विरोध होत आहे. त्यातच आता पालकमंत्री मंगलप्रभात लाेढा यांनी प्रत्येक प्रभागात अधिकृत कबुतरखाने सुरू करण्याचे सूताेवाच करताना यामुळे नागरिकांना त्रास न हाेता कबुतरांना नियंत्रित पद्धतीने खाद्य मिळू शकेल, असे त्यांनी स्पष्ट केले.
---
३०० सूचना आणि हरकती
मुंबई महापालिकेने आता कबुतरांना नियंत्रित पद्धतीने खाद्य घालण्याबाबत पालिकेकडे सुमारे ३०० सूचना-हरकती प्राप्त झाल्या आहेत. मुंबई महापालिकेने कबुतरांना खाद्य घालण्यास मनाई केल्यानंतर काही पक्षीप्रेमींनी उच्च न्यायालयात धाव घेतली होती. त्या वेळी दादर येथील कबुतरखान्याजवळील कबुतरांना दररोज सकाळी ६ ते ८ या वेळेत खाद्य देण्याच्या मागणीचा विचार सुरू असल्याची माहिती महापालिकेने उच्च न्यायालयात दिली. तेव्‍हा परवानगी देण्यापूर्वी जाहीर सूचना काढावी आणि प्रस्तावावर हरकती-सूचना मागवाव्यात, असा आदेश न्यायालयाने दिला.
------------
कबुतरांना नियंत्रित खाद्य घालण्यासंदर्भात सूचना-हरकती मागविण्यात आल्या. लोकांचे मत जाणून घेतले तर प्रक्रिया पूर्ण करा. आता मंत्री मंगलप्रभात लोढा हे प्रत्येक वॉर्डात कबुतरखाने सुरू करण्याचा विचार करीत आहेत. हा प्रकार मनमानी करण्यासारखाच आहे. त्याला सर्वांनी विरोध करायला हवा.
- डी. स्टॅलिन, पर्यावरणतज्ज्ञ
---------
प्रत्येक प्रभागात कबुतरखाने सुरू करण्याचा प्रकार म्हणजे मुंबई महापालिका निवडणुकीत विशिष्ट समाजाला खूश करण्यासाठी आणि त्यांची मते मिळवण्यासाठी हे प्रयत्न सुरू झाले आहेत.
- हर्षल प्रधान, प्रवक्ते, शिवसेना (उद्धव बाळासाहेब ठाकरे) पक्ष
-------------
भाजप व्होटबॅंकेसाठी लोकांचे आरोग्य आणि भावनेशी खेळत आहे. त्यामुळेच लोकांच्या प्रश्नांऐवजी ते प्रत्येक वॉर्डात कबुतरखाने सुरू करणार आहेत. मानवी वस्तीत हे कबुतरखाने नकोत.
- सुरेशचंद्र राजहंस, प्रवक्ते, काॅँग्रेस