उड्डाणपुलावरील पदपथाची दुरवस्था

उड्डाणपुलावरील पदपथाची दुरवस्था
नूतनीकरण करण्याची प्रवाशांची मागणी
कांदिवली, ता. १६ (बातमीदार) ः बोरिवली पूर्व आणि पश्चिमेला जोडणाऱ्या मेजर करिअप्पा उड्डाणपुलाच्या पदपथाची दयनीय अवस्था झाली आहे. दैनंदिन कामासाठी बोरिवली स्‍थानकात जाण्यासाठी दररोज शेकडो प्रवासी उड्डाणपुलाच्या पदपथाचा वापर करतात. गेल्या तीन वर्षांपासून पदपथावरील लाद्या निखळलेल्‍या अवस्‍थेत आहेत. काही ठिकाणी खड्डे पडले आहेत. पालिकेच्या संबंधित विभागाने तातडीने पदपथाचे नूतनीकरण करावे, अशी मागणी प्रवाशांमध्ये जोर धरू लागली आहे.
बोरिवली पश्चिम, स्वामी विवेकानंद मार्गाहून पूर्वेला राजेंद्र नगरकडे जाण्यासाठी तसेच बोरिवली फलाटावर जाण्यासाठी शेकडो प्रवासी मेजर करिअप्पा उड्डाणपुलाचा वापर करतात. या उड्डाणपुलावर वाहनांची मोठ्या प्रमाणात वाहतूक सुरू असते. उंच सखल भाग, तुटलेल्या लाद्या यामुळे घाईगडबडीत चालताना प्रवाशांना ठेच लागणे, चप्पल तुटणे असे प्रकार घडतात. पालिकेने तातडीने नूतनीकरण अथवा डागडुजी करावी, अशी मागणी प्रवाशांकडून केली जात आहे.