उसाटने येथे खासगी बसचालकावर हल्ला

उसाटने येथे खासगी बसचालकावर हल्ला
कल्याण, ता. १६ (बातमीदार) : उसाटने परिसरात वाहनचालकांमधील किरकोळ वादातून एका खासगी बसचालकावर दुचाकीस्वारांनी हल्ला केल्याची घटना घडली. बसचालकाने दुचाकीला बाजू न दिल्याच्या कारणावरून वाद सुरू झाला आणि त्याचे रूपांतर मारहाणीत झाले. यामध्ये बसचालकाच्या डोक्यावर दगडाने आघात करण्यात आला असून, त्याला सहा टाके पडले आहेत. याप्रकरणी हिललाईन पोलिस ठाण्यात गुन्हा दाखल करण्यात आला आहे.

हाणामारीची घटना बसमधील एका प्रवाशाने आपल्या मोबाईल कॅमेऱ्यात टिपली असून, हा व्हिडिओ पोलिसांकडे सुपूर्द करण्यात आला आहे. जखमी चालक दररोज उल्हासनगरहून प्रवासी घेऊन कंपनीत येतो. घटनेवेळी वाहतूक कोंडीमुळे दुचाकीस्वार रागावून शिवीगाळ करीत मारहाण करू लागले. हिललाईन पोलिस ठाण्यात गुन्हा दाखल करण्यात आला असून, संबंधित तरुणांचा शोध सुरू आहे. घटनास्थळी उपस्थित प्रवासी आणि नागरिकांनी मध्यस्थी करण्याचा प्रयत्न केला, मात्र अचानक झालेल्या हल्ल्यामुळे एकच गोंधळ उडाला. पोलिसांनी आरोपी लवकरात लवकर गजाआड करण्याचे आश्वासन दिले आहे.