स्टेम क्लोरिन वायूगळतीबाबत अहवाल देण्याचे निर्देश

वायुगळतीप्रकरणी अहवाल सादर करा
आयुक्ताचे स्टेम प्राधिकरणाच्या संचालकांना निर्देश

भिवंडी, ता. १६ (वार्ताहर) : भिवंडी महापालिका क्षेत्रातील टेमघर येथील स्टेम प्राधिकरणाच्या जलप्रक्रिया प्रकल्पात ८ सप्टेंबर रोजी रात्री क्लोरिन वायुगळतीची घटना घडली. या घटनेची गंभीर दखल घेत भिवंडी पालिका आयुक्त अनमोल सागर यांनी स्टेम प्राधिकरणाच्या व्यवस्थापकीय संचालकांना एका पत्राद्वारे अहवाल सादर करण्याचे स्पष्ट आदेश दिले आहेत.

उपलब्ध माहितीनुसार, स्टेम प्राधिकरणामार्फत भिवंडीसह ठाणे, मिरा-भाईंदर महापालिका व ग्रामीण भागात पाणीपुरवठा केला जातो. या प्रकल्पातील ३० ते ४० क्लोरिन बुलेट्सपैकी एका बुलेटमधून वायुगळती झाल्याचे सेक्शन इंजिनिअर अर्पित अग्रवाल यांनी निदर्शनास आणून दिले. घटनेची माहिती मिळताच पालिकेच्या आपत्ती व्यवस्थापन आणि अग्निशमन विभागाचे अधिकारी व कर्मचारी घटनास्थळी दाखल झाले. अग्निशमन दलाच्या जवानांनी तातडीने सुरक्षा उपकरणांच्या सहाय्याने गळती नियंत्रणात आणली.

गळती वेळेवर आटोक्यात आणल्यामुळे मोठी जीवितहानी टळली. मात्र भविष्यात अशा घटना टाळण्यासाठी नेमकी कोणती त्रुटी राहिली आणि त्या सुधारण्यासाठी कोणत्या उपाययोजना करता येतील, यावर आधारित सविस्तर अहवाल सादर करण्याचे निर्देश आयुक्तांनी दिले आहेत. घटनेची अंतर्गत चौकशी करून जबाबदार अधिकाऱ्यांवर कारवाई करण्याचेही आदेश देण्यात आले आहेत. सुरक्षेच्या दृष्टीने तातडीच्या उपाययोजना करून अहवाल भिवंडी पालिकेच्या मुख्य आपत्ती व्यवस्थापन विभागाकडे सादर करावा, असे आयुक्त सागर यांनी स्पष्ट केले आहे.