प्रशासकीय राजवटीतही ‘नगरसेवक’ स्टिकर

प्रशासकीय राजवटीतही ‘नगरसेवक’ स्टिकर
- वाहतूक पोलिसांचे दुर्लक्ष

डोंबिवली, ता. १६ : कल्याण डोंबिवली महापालिकेत मागील पाच वर्षे प्रशासकीय राजवट लागू असून, कोणतेही लोकप्रतिनिधी अस्तित्वात नाहीत. असे असतानाही शहरात काही वाहनचालक आपल्या खासगी गाड्यांवर ‘नगरसेवक’, ‘सभागृह नेता’, ‘आमदार’ अशा पदांचे स्टिकर्स लावून बिनधास्त फिरताना दिसत आहेत. विशेष म्हणजे वाहतूक पोलिस या वाहनांकडे दुर्लक्ष करीत असल्याचा आरोप नागरिकांकडून करण्यात येत आहे.

एमएच ०४ची पासिंग असलेली काही चारचाकी वाहने काळ्या काचा, फॅन्सी नंबर प्लेट आणि ‘केडीएमसी नगरसेवक’ अशा स्टिकर्ससह शहरात खुले आम फिरत आहेत. काही गाड्या तर थेट डोंबिवलीतील केडीएमसी उपविभागीय कार्यालयात पार्क केल्या जात आहेत. अशा वाहनांवर कोणतीही कारवाई होत नसल्याने हे वाहनचालक खुले आम नियम मोडत आहेत. सामान्य दुचाकीस्वार, रिक्षाचालकांनी जर नियम मोडले तर त्यांच्याकडून तत्काळ दंड आकारला जातो. मात्र या ‘स्टिकरधारी’ गाड्यांना अप्रत्यक्ष संरक्षण दिले जात असल्याचे चित्र आहे. यामुळे वाहतूक पोलिस नियम सर्वांसाठी समानपणे लागू करीत आहेत का, असा प्रश्न उपस्थित होत आहे.

कारवाईची मागणी
महापालिका निवडणुकीचे वारे वाहू लागले असले तरी सध्या कोणताही नगरसेवक अस्तित्वात नाही. अशा स्थितीत ‘नगरसेवक’ स्टिकरचा वापर करून काही जण प्रशासकीय यंत्रणेची फसवणूक करीत असल्याचा आरोप होत आहे. वाहतूक पोलिसांनी अशा गाड्यांवर तातडीने कारवाई करणे गरजेचे आहे अन्यथा सामान्य नागरिकांचा प्रशासनावरील विश्वास ढासळण्याची शक्यता आहे. प्रशासन आणि वाहतूक विभागाने याकडे गांभीर्याने लक्ष देणे गरजेचे आहे.