मिरा-भाईंदरला शुक्रवारी पाणी नाही

भाईंदर, ता. १६ (बातमीदार) : महाराष्ट्र औद्योगिक विकास महामंडळाने पाणीपुरवठा योजनेच्या जांभुळ येथील जलशुद्धीकरण केंद्रातील गुरुत्व वाहिनीवर देखभाल-दुरुस्तीचे काम घेतले असल्याने मिरा-भाईंदरला शुक्रवारी (ता. १९) पाणी मिळणार नाही. या कामासाठी महामंडळाने २४ तासांचा शटडाऊन घेतला आहे. त्यामुळे महामंडळाकडून होणारा पाणीपुरवठा गुरुवारी (ता. १८) रात्री १२ ते शुक्रवारी (ता. १९) रात्री १२ वाजेपर्यंत पूर्णपणे बंद राहणार आहे, मात्र या काळात स्टेम प्राधिकरणाकडून होणारा पाणीपुरवठा सुरू राहणार आहे. हा पाणीपुरवठा पुर्ववत होईपर्यत शहराला कमी दाबाने व उशिराने वितरण होणार आहे. त्यामुळे नागरिकांनी पाण्याचा वापर काटकसरीने करावा, असे आवाहन महापालिकेकडून करण्यात आले आहे.