स्वस्थ नारी निरोगी परिवार अभियानांतर्गत जिल्हयात आरोग्य शिबिरे

स्वस्थ नारी निरोगी परिवार अभियानांतर्गत जिल्हयात आरोग्य शिबिरे
अलिबाग (वार्ताहर) ः जिल्हाधिकारी किशन जावळे व मुख्य कार्यकारी अधिकारी नेहा भोसले यांच्या मार्गदर्शनाखाली जिल्हा शल्य चिकित्सक डॉ. निशिकांत पाटील यांच्या नियोजनाने महिलांच्या आरोग्याविषयी जागरूकता वाढविण्यासाठी आणि त्यांना आरोग्य सेवा उपलब्ध करून देण्यासाठी स्वस्थ नारी निरोगी परिवार हे विशेष अभियान जिल्ह्यात राबविण्यात येणार आहे. हे अभियान १७ सप्टेंबर ते २ ऑक्टोबर या कालावधीत संपूर्ण जिल्ह्यात आयोजित करण्यात आले आहे, अशी माहिती जिल्हा आरोग्य अधिकारी डॉ.मनिषा विखे यांनी दिली आहे.
या अभियानाचे मुख्य उ‌द्दीष्ट ग्रामीण आणि शहरी भागातील महिलांना त्यांच्या आरोग्याविषयी शिक्षित करणे आणि त्यांच्यासाठी मोफत आरोग्य तपासणी शिबिरे आयोजित करणे आहे. या शिबिरांमध्ये स्तन आणि गर्भाशयाच्या कर्करोगाची प्राथमिक तपासणी, रक्तदाब आणि मधुमेहाची तपासणी, हिमोग्लोबिन तपासणी, सिकलसेल रोग तपासणी, सिकलसेल कार्डाचे वितरण, तोंडाचा कर्करोग, गर्भाशयाचा कर्करोग आणि स्तनाचा कर्करोग निदानासाठी तपासणी, मासिक पाळीतील स्वच्छता व पोषण, रक्तदान मोहिम शिबीर, माता व बालकांचे संरक्षण कार्ड, क्षयरोग तपासणी, माता बालकांचे लसीकरण, निक्षय मित्र बनवण्यासाठी मोहिम, रक्तदान शिबिराचे आयोजन, इतर सामान्य आरोग्य, समस्यांसाठी समुपदेशन करण्यात येणार आहे.
या अभियानात सर्व सरकारी रुग्णालये, प्राथमिक आरोग्य केंद्रे आणि आरोग्य उपकेंद्रे सहभागी होणार आहेत. विशेषतः ५० वर्षावरील महिलांनी या शिबिरांचा लाभ घ्यावा, असे आवाहन करण्यात आले आहे.