जिथे कबुतरखाने तिथे चिकन-मटण सेंटर!

जिथे कबुतरखाने तिथे चिकन-मटण सेंटर!
‘आम्ही गिरगावकर’ आक्रमक; मराठी-जैन वाद उफाळणार?

सकाळ वृत्तसेवा
मुंबई, ता. १६ : मंत्री मंगलप्रभात लोढा यांनी सोमवारी (ता. १५) संजय गांधी राष्ट्रीय उद्यानाजवळ नवीन कबुतरखान्याचे उद्‍घाटन करताना मुंबईतील प्रत्येक वॉर्डमध्ये कबुतरखाने उभारले जातील, अशी घोषणा केली. त्यानंतर आता ‘आम्ही गिरगावकर’ संस्थेने जेथे जेथे कबुतरखाने उभारले जातील तेथे तेथे चिकन-मटण सेंटर उभारण्याची भूमिका घेतली आहे. यामुळे राजकीय आणि सामाजिक वर्तुळात खळबळ उडाली असून, मराठी विरुद्ध जैन असा वाद उफाळण्याची चिन्हे दिसत आहेत.
‘आम्ही गिरगावकर’ या संस्थेने लोढा यांच्या घोषणेला तीव्र विरोध केला आहे. ‘स्वतःच्या विभागातील मराठी लोकांना हिंदुत्वाच्या नावाखाली मूर्ख बनवून, मंदिर पाडून डेरासर उभे करणाऱ्या लोढा यांनी आता कबुतरखान्यांचा खेळ सुरू केला आहे. हा डाव आम्ही हाणून पाडू,’ असा इशारा त्यांनी दिला आहे. संस्थेने मागणी केली आहे, की लोढा यांच्या राहत्या इमारतीमध्ये आणि ज्या ज्या ठिकाणी कबुतरखाने उभारले जातील त्या त्या ठिकाणी आम्हाला चिकन-मटण सेंटर उभारण्याची परवानगी मिळावी. त्यांनी अशी मागणी करणारे पत्रही महापालिका प्रशासनाला दिले आहे. त्यामुळे आता महापालिका निवडणुकीच्या तोंडावर हा मुद्दा राजकीय रंग घेण्याची चिन्हे आहेत. भाजपकडून हा जैन समाजाला जवळ करण्याचा प्रयत्न असल्याचे बोलले जात असून, मराठी मतदारांची नाराजी यानिमित्ताने तीव्र होण्याची शक्यता वर्तविली जात आहे. थोडक्यात, लोढा यांच्या कबुतरखाना घोषणेने आता मुंबईत नवा मराठी-जैन संघर्ष पेटण्याची भीती व्यक्त केली जात आहे.
...
मंत्री लोढा यांची कबुतरखान्यांची घोषणा आम्हाला मान्य नाही. मुंबईच्या प्रत्येक वॉर्डमध्ये कबुतरखाने असतील तर तिथेच आम्हालाही चिकन-मटण सेंटर उभारण्याचा अधिकार मिळालाच पाहिजे. मराठी माणसाचा अपमान सहन करणार नाही. हा डाव आम्ही हाणून पाडू.
- गौरव सागवेकर, अध्यक्ष, आम्ही गिरगावकर