पॉईंट बिघाडामुळे पश्चिम रेल्वेची वाहतूक विस्कळीत

तांत्रिक बिघाडामुळे
पश्चिम रेल्वेचा खोळंबा
मुंबई, ता. १६ : पश्चिम रेल्वेच्या अंधेरी स्थानकात मंगळवारी सायंकाळी चारच्या सुमारास रेल्वे पॉईंटमधील तांत्रिक बिघाडामुळे लोकल वाहतूक विस्कळित झाली. कार्यालयातून घराकडे निघालेल्या नोकरदारांना या बिघाडाचा मोठा फटका बसला. अनेक लोकल विलंबाने धावत असल्याने स्थानकांमध्ये गर्दी वाढली होती. त्यामुळे प्रवाशांचे मोठे हाल झाले. 
पश्चिम रेल्वेने दिलेल्या माहितीनुसार, अंधेरी स्थानकात दोन्ही अप-डाऊन मार्गावरील पॉईंटमध्ये अचानक बिघाड झाल्याने लोकल वाहतूक ठप्प झाली. याबाबत कळताच, अभियांत्रिकी पथक तातडीने घटनास्थळी दाखल झाले आणि दुरुस्तीची कामे सुरू करण्यात आली. काही वेळातच बिघाड दुरुस्त करण्यात आला; मात्र खोळंब्यामुळे लोकलचे वेळापत्रक विस्कळित झाल्याने संध्याकाळी सातपर्यंत लोकल सरासरी १० ते १५ मिनिटांच्या विलंबाने धावत होत्या. त्यामुळे मुंबई सेंट्रल, दादर, वांद्रे, अंधेरी आणि बोरीवलीसारख्या महत्वाच्या स्थानकांवर प्रवाशांची मोठी गर्दी उसळली.