कल्याण पूर्वेतील खड्डे बुजविण्यास सुरूवात

कल्याण पूर्वेतील खड्डे बुजविण्यास सुरुवात
महेश गायकवाडांच्या आंदोलनाच्या इशाऱ्यानंतर कामाला वेग

कल्याण, ता. १७ (बातमीदार) : गणेशोत्सवानंतर कल्याण पूर्वेतील रस्त्यांची दयनीय अवस्था झाली होती. दुरुस्त केलेले रस्ते पुन्हा उखडल्यामुळे माजी नगरसेवक महेश गायकवाड यांनी महापालिकेला नवरात्रोत्सवापूर्वी चार दिवसांत रस्ते दुरुस्त करावेत, अन्यथा तीव्र आंदोलन होईल, असा इशारा दिला होता. याबाबत ‘सकाळ’नेही वृत्त दिले होते. त्यामुळे आता पावसाने थोडी विश्रांती घेतल्यानंतर २४ तासांतच पूर्वेतील खड्डे भरण्याचे काम सुरू करण्यात आले आहे.

पूर्वेतील पूना लिंक रोड, कोळसेवाडी, काटेमानिवली, चिंचपाडा रोड, म्हसोबा चौक, श्री मलंगगड रोड अशा मुख्य रस्त्यांसह सर्व अंतर्गत रस्ते अत्यंत खराब अवस्थेत आहेत. या खड्ड्यांमुळे प्रवास करणे खूप अवघड झाले आहे. अनेक रिक्षांचे भाग तुटल्यामुळे रिक्षाचालकही त्रस्त आहेत. महेश गायकवाड यांनी गणेशोत्सवाच्या आधी महापालिकेला याबाबत सूचना दिली होती; पण काम पूर्णपणे झाले नाही. त्यामुळे करदात्यांचा पैसा वाया गेला का, असा संतप्त प्रश्न त्यांनी उपस्थित केला आहे. महापालिका आयुक्तांसह त्यांनी मागील आठवड्यात पाहणीही केली होती, तरीही समस्या कायम आहे.

गायकवाड यांनी नवरात्रोत्सवापूर्वी चार दिवसांत रस्ते दुरुस्त न झाल्यास नागरिकांच्या रोषाला सामोरे जाण्याची तयारी ठेवावी, असा इशारा दिला. त्यांच्या या शब्दांनंतरच पूर्वेतील रस्त्यांवर खड्डे भरण्याचे काम हाती घेतले गेले आहे.