बनावट स्वाक्षरी प्रकरणात कनिष्ठ अभियंत्याला अटक

बनावट स्वाक्षरीप्रकरणी कनिष्ठ अभियंत्याला अटक
भाईंदर, ता. १७ (बातमीदार) : मिरा भाईंदर महापालिकेत वरिष्ठ अधिकाऱ्यांच्या बनावट स्वाक्षऱ्या करून बेकायदा स्टॉलचे वाटप केल्याप्रकरणी महापालिकेचा कनिष्ठ अभियंता शैलेश शिंदे याला बुधवारी (ता. १७) भाईंदर पोलिसांनी अटक केली आहे.
गेल्या वर्षी महापालिका आयुक्तांकडे यासंदर्भात तक्रार आल्यानंतर चौकशी करण्यात आली होती. या चौकशीत १४ स्टॉलसाठी बेकायदा परवानगी दिल्याचे उघड झाले. या परवानग्यांवर शहर अभियंता दीपक खांबित यांच्या बनावट स्वाक्षऱ्या असल्याचे निष्पन्न झाले. या गैरप्रकारात कनिष्ठ अभियंता शैलेश शिंदे याचा सहभाग असल्याचे चौकशीतून समोर आले. त्याने बनावट स्वाक्षऱ्या करून स्टॉलच्या परवानग्या दिल्या आणि त्यासाठी हजारो रुपये उकळले, असेही चौकशीत आढळले. यामुळे त्याला गेल्या वर्षी जूनमध्ये निलंबित करण्यात आले होते आणि महापालिकेकडून पोलिसात तक्रार दाखल करण्यात आली होती. गेल्या आठवड्यातच तो सेवेत पुन्हा रुजू झाला असताना, तब्बल एक वर्षानंतर या प्रकरणाची चौकशी पूर्ण झाल्यावर पोलिसांनी त्याला बुधवारी अटक केली.