भाजपा लागला पालिका निवडणूकीच्या तयारीला

भाजप लागला पालिका निवडणुकीच्या तयारीला
३०० हून अधिक ठिकाणी नवरात्रोत्सव, रामलीला छटपूजेचे आयोजन
सकाळ वृत्तसेवा
मुंबई, ता. १७ ः मुंबई महापालिका निवडणुकीच्या तयारीला भाजप लागला आहे. मुंबईत भाजप ३०० पेक्षा जास्त नवरात्रोत्सवाचे आयोजन करणार आहे. नवरात्र, दुर्गामहोत्सव, रामलिला या उत्सवांचेही विभागवार आयोजन करण्यात येणार आहे. त्यामुळे हे उत्सव भाजपसाठी मतपेटीची बांधणी करण्यासाठी फायदेशीर ठरणार असल्याची चर्चा आहे.
मुंबई महापालिकेची निवडणूक जानेवारीपर्यंत होणार आहे. त्यामुळे सर्वच राजकीय पक्ष निवडणुकीच्या तयारीला लागले आहेत. भाजपचा विजय संकल्प मेळावा वरळीत झाला. त्यात मुंबई महापालिका जिंकण्याचा निर्धार व्यक्त करण्यात आला आहे. पालिका जिंकण्यासाठी विविध पातळ्यांवर भाजप काम करीत आहे. सुमारे ३०० पेक्षा अधिक ठिकाणी नवरात्रोत्सव साजरे केले जाणार आहेत. नवरात्र, दुर्गामहोत्सव, रामलीला आणि छटपूजा उत्सवांच्या तयारीला भाजप लागला आहे. त्या पार्श्वभूमीवर तयारी करण्यासाठी मुंबई उपनगरचे पालकमंत्री ॲड. आशीष शेलार यांच्या अध्यक्षतेखाली संयुक्त आढावा बैठक घेण्यात आली. या बैठकीला दुर्गोत्सव, रामलीला आणि छटपूजा समित्यांच्या विविध संघटनांचे प्रतिनिधी उपस्थित होते.
छटपूजा मुंबईत ८२ प्रमुख ठिकाणी मोठ्या उत्साहात साजरी केली जाते. रामलीला उत्सव मुंबईसह राज्यभर मोठ्या प्रमाणावर साजरा केला जातो. मुंबईत होणाऱ्या रामलीला मैदानांवर पार्किंगची व्यवस्था करण्यात यावी. तसेच वाहतूक कोंडी टाळण्यासाठी वाहतूक पोलिसांना विशेष निर्देश देण्यात आले. प्रवचन किंवा आध्यात्मिक कार्यक्रमांसाठी मंडपासारख्या तात्पुरत्या बांधकामांना रामलीला सुरू होण्याच्या आधी व नंतर मिळून एकूण पाच दिवसांची परवानगी मिळणार आहे.