‘किल्ला बनवा कार्यशाळे’ला विद्यार्थ्यांचा प्रतिसाद

‘किल्ला बनवा’ कार्यशाळेला विद्यार्थ्यांचा प्रतिसाद
चिमुकल्या हातांनी साकारले किल्ले, ‘सकाळ-एनआयई’चा उपक्रम
पेण, ता. १७ (वार्ताहर) : ‘सकाळ एनआयई’ आणि श्रीमती सुमती देव विद्यालय यांच्या संयुक्त विद्यमाने आयोजित ‘किल्ला बनवा’ कार्यशाळेला विद्यार्थ्यांचा मोठा प्रतिसाद मिळाला. पर्यावरण संवर्धनासोबतच आपली संस्कृती व इतिहास जपण्याच्या उद्देशाने आयोजित या कार्यशाळेत ५वी ते ९वीच्या विद्यार्थ्यांनी उत्साहाने सहभाग घेतला.
कार्यशाळेत मूर्तिकार प्रशिक्षक कैलास चोरघे यांनी विद्यार्थ्यांचे गट पाडून मातीपासून किल्ले कसे बनवायचे याचे प्रात्यक्षिक दाखवले. त्यानंतर विद्यार्थ्यांनी आपल्या कल्पकतेतून विविध प्रकारचे किल्ले साकारले. ॲड. हर्षल मोरे यांनीही विद्यार्थ्यांना मार्गदर्शन केले. या वेळी मुख्याध्यापक संदीप भोर, प्रशासन अधिकारी आर. आर. पाटील, पर्यवेक्षक सतीश पाटील तसेच शिक्षकवृंद उपस्थित होता.
मुख्याध्यापक संदीप भोर म्हणाले, की किल्ला बनविण्याची कार्यशाळा म्हणजे संस्कृती आणि संस्कार जपणुकीचे माध्यम आहे. विद्यार्थ्यांना इतिहासाची गोडी लागावी आणि गड-किल्ल्यांचे महत्त्व कळावे, यासाठी हा उपक्रम उपयुक्त आहे. तसेच पर्यवेक्षक सतीश पाटील यांनी सांगितले, की आजची पिढी मोबाईलमध्ये गुंतलेली असते. अशा कार्यशाळा विद्यार्थ्यांच्या कलागुणांना वाव देतात आणि परंपरा पुढील पिढीपर्यंत पोहोचवतात.