तळकोकणातील विद्यार्थ्यांना ३०० सायकलींचे वितरण

तळकोकणातील विद्यार्थ्यांना ३०० सायकलींचे वितरण
उपमुख्यमंत्री एकनाथ शिंदे यांच्या वाढदिवसानिमित्त उपक्रम
नवी मुंबई, ता. १७ : शिवसेना नेते आणि उपमुख्यमंत्री एकनाथ शिंदे यांच्या वाढदिवसानिमित्त बेलापूर विधानसभा जिल्हाप्रमुख किशोर पाटकर यांच्या संकल्पनेतून तळकोकणातील होतकरू व गरजू विद्यार्थ्यांना सायकलींचे मोफत वितरण करण्यात आले. सिंधुदुर्ग जिल्ह्यातील मिठबाव, डिगस आणि तुळसुली येथील तीन शाळांना प्रत्येकी १०० सायकली देण्यात आल्या. या माध्यमातून एकूण ३०० विद्यार्थ्यांना मोठा दिलासा मिळाला.
कुडाळ येथे आयोजित कार्यक्रमात कालिका प्रासादिक शिक्षण प्रसारक मंडळ डिगस येथील माध्यमिक विद्यालय, तसेच लिंगेश्वर विद्यालय व कनिष्ठ महाविद्यालय तुळसुलीतील विद्यार्थ्यांना आमदार नीलेश राणे यांच्या हस्ते सायकलींचे वाटप झाले, तर श्री रामेश्वर हायस्कूल, मिठबाव येथील विद्यार्थ्यांनाही सायकली देण्यात आल्या. या वेळी शिवसेना पदाधिकारी, दत्ता सामंत, दीपलक्ष्मी पडते, दादा साईल, विनायक राणे यांच्यासह स्थानिक मान्यवर, ग्रामस्थ, पालक व शिक्षक मोठ्या संख्येने उपस्थित होते. किशोर पाटकर यांच्या या उपक्रमामुळे दररोज पायी शाळेत ये-जा करणाऱ्या विद्यार्थ्यांना मोठा दिलासा मिळाला आहे. यामुळे त्यांचा वेळ आणि ऊर्जा वाचून शैक्षणिक प्रवास अधिक सुकर होईल, अशी भावना पालक व शिक्षकांनी व्यक्त केली. आमदार नीलेश राणे यांनी या उपक्रमाचे कौतुक करताना, विद्यार्थ्यांसाठी दिलेली ही मदत खरोखरच स्तुत्य आहे, असे मत व्यक्त केले. याआधीही पाट पंचक्रोशी व पणदूर तिठा परिसरातील दुर्गम भागातील विद्यार्थ्यांना, शिवाजी विद्यालय हिर्लोक आणि वासुदेव सरस्वती विद्यालय माणगाव येथे प्रत्येकी १०० सायकलींचे मोफत वाटप करण्यात आले होते. अशा उपक्रमातून ग्रामीण विद्यार्थ्यांना शिक्षणाची नवी दिशा मिळत असल्याचे मत स्थानिकांनी व्यक्त केले.