ज्येष्ठ नागरिक भवन मध्ये गाथा विजयाची कार्यक्रम संपन्न

ज्येष्ठ नागरिक भवनमध्ये गाथा विजयाची कार्यक्रम उत्साहात
नेरूळ, ता. १८ (बातमीदार) ः नेरुळमधील ज्येष्ठ नागरिक भवन येथे गाथा विजयाची हा कार्यक्रम गुरुवार (ता. १८) उत्साहात पार पडला. या कार्यक्रमात सुप्रसिद्ध शिवकथाकार विजयराव देशमुख यांचा जीवनप्रवास, त्यांनी केलेले अलौकिक शिवकार्य आणि गुरुकार्य उलगडून दाखवले.
इतिहासकार, कवी, गीतकार, साहित्यिक, नाटककार, ललित लेखक आणि प्रबोधनकार असे अष्टपैलू व्यक्तिमत्व असलेल्या विजयराव यांना कोल्हापूर मठाचे शंकराचार्य प.प. विद्यानृसिंह भारती यांनी नुकतेच धर्मभास्कर या उपाधीने गौरवान्वित केले आहे. या निमित्ताने त्यांच्या स्फुरणातून निर्माण झालेल्या गीतांचे सादरीकरण, ऐतिहासिक, सामाजिक कथांचे अभिवाचन करण्यात आले. या कार्यक्रमाचे सादरीकरण पत्रभेट प्रकाशनच्या वतीने करण्यात आले तर, या कार्यक्रमास विशेष सहकार्य नवरंग साहित्य, संस्कृती आणि कला मंडळाचे लाभले.