रस्ते अपघातात दोघांचा मृत्यू

पालघर, ता. १८ ः जिल्ह्यातील विविध रस्ते अपघातांत दोघांचा मृत्यू झाला. याबाबत तलासरी आणि मनोर पोलिस ठाण्यात गुन्हे दाखल करण्यात आले आहेत.

मनोर पोलिस ठाणे हद्दीत एरंबी गावाच्या पुढे असलेल्या वीटभट्टीजवळ घडलेल्या अपघातात विशाल शंकर वनगा (वय २८) याचा मृत्यू झाला. तो सावरे सासेपाडा येथे राहत होता. गवताने भरलेल्या टेम्पोवर विशाल क्लीनरचे काम करत होता. टेम्पो रस्त्याने जात असताना एरंबी गावाच्या पुढे समोर एक कार आल्याने चालकाचे नियंत्रण सुटले. टेम्पो पलटी होण्याच्या वेळेत विशाल याने टेम्पोतून खाली उडी मारली. उडी मारल्यानंतर विशाल याच्या अंगावर टेम्पो पडला. त्यामुळे गंभीर जखमी होऊन त्याचा जागीच मृत्यू झाला. याप्रकरणी चालक मिलिंद उदय वनगा याच्याविरोधात गुन्हा दाखल आहे.

तलासरी पोलिस ठाणे हद्दीत २५ ऑगस्ट रोजी झालेल्या अपघातात जखमी असलेल्या रेशमबाई भवरलाल लघवंशी यांचा मृत्यू झाल्याची घटना घडली. तीनधाम यात्रा करण्यासाठी खासगी बसमधून त्या जात होत्या. तलासरी येथील दापचारी सीमा तपासणी नाका येथे बस थांबवली असता त्या महामार्गावर गुजरात वाहिनीवर लघुशंकेसाठी जात असताना एका कंटेनरने त्यांना जोरदार धडक दिली. या धडकेमध्ये गंभीर जखमी झाल्यानंतर त्यांच्यावर रुग्णालयात उपचार सुरू होते. याप्रकरणी अज्ञात कंटेनरचालकाविरोधात तलासरी पोलिसांनी बुधवारी (ता. १७) गुन्हा दाखल केला आहे.